Shillong, Jymmang 29:
Ka Meghalaya High Court ha ka Lah Sngi U Blei ka la bthah ïa ka tnat BSF ban ïatreilang bad u Investigation Officer lane u pulit uba tohkit halor ka jingsiat ïap ki shipai BSF ïa u Bah Roning Nongkynrih ha ka miet jong ka 5 tarik Jymmang.
Ka tnat BSF ka la leit sha ïingbishar ban pyrshah ïa ka hukum ba la pynmih da u Judicial Magistrate First Class, Shillong ha ka 15 tarik Jymmang, 2023, ha kaba ïadei bad ka Pynursla P.S. Case No. 12(05) 2023 hapoh ki kyndon 120B/302/201 IPC bad ka kyndon 27 jong ka Arms Act.
Na ka mukotduma ba la ai da ka tnat BSF, la pyni ba ha ka 5 tarik Jymmang, 2023 hajan ka shnong Wahkdait kaba don ha ka surok Pynursla-Dawki, ki la don kumba lai ngut ki shipai BSF kiba la lap lane ïakynduh bad kawei ka kali ha kaba ka rukom ïaid jong kata ka kali ka la pynsuba sniew ba ka la kit ïa ki mar be-aiñ lane ïa ki masi.
La ong ruh ba hadien ba la ai dak ïa ka kali ba kan sangeh, u nongñiah u la ïaid beit, bad kita ki lai ngut ki BSF ki la shim ïa ki sienjam ban khanglad ïa kata ka kali ba kan phet. La ong ba ki BSF ki la siat ïa kata ka kali bad na ka daw jong ka jingsiat, uwei u briew u la mynsaw jur bad hadien katto katne u la khlad noh.
Katkum ki kyndon aiñ haba don kum kitei ki jingjia, kito kiba donkti (kiba dei ki shipai BSF) ki dei ban shah kem, bad ïa kane, ki heh BSF ki la leh. Ha kawei pat ka liang, ka la don ka FIR ba la ai ha kaba ïadei bad katei ka jingjia ha thanat Pynursla bad la pdiang ruh ïa ka (Case No. 12(05) of 2023), bad ka jingtohkit ka la sdang.
Ha ka jingtohkit, la leit rah ïa katei ka kam sha u Magistrate, bad namarkata, u Magistrate u la pynmih da ka hukum ha ka 15 tarik Jymmang, 2023, ha kaba u la bthah ïa u Commandant ka 4th Battalion, BSF, ban aiti ïa kitei ki lai ngut ki BSF sha u pulit uba tohkit ïa katei ka jingjia siat ïap.
Hynrei, ka tnat BSF, lyngba u Deputy Inspector General, BSF, ki la leit sha High Court ban pyrshah ïa ka hukum jong utei u Magistrate. La kyrpad ruh ïa ka High Court ba kan pyndam noh ïa katei ka hukum jong ka 15 tarik Jymmang, 2023.
Na ka liang ka sorkar jylla, ka la pyrshah ïa katei ka mukotduma bad ka la pynpaw ba kam don kano-kano ka jingbakla ha katei ka hukum ba pynmih da u Magistrate.
Hadien ba ka ïingbishar ka la sngap ïa u muktiar ka Sorkar Pdeng bad ïa u Additional Advocate General ka jylla, ka High Court, da ka jingmynjur lang jong ki mamla, ka la pynmih ïa ki jingbthah kumno ban ïaid ha kaba ïadei bad katei ka kam.
Kine ki jingbthah ki long ba ki heh BSF ki dei ban ai ïa ka jingïatreilang bad u pulit uba tohkit halor katei ka jingjia. Ki heh BSF kin don ruh ka lad ban wanrah ïa kitei ki lai ngut ki shipai BSF hakhmat u pulit uba tohkit khnang ba un lah ban tohkit bniah na ki halor katei ka jingjia ha ka 5 tarik Jymmang, 2023.
La bthah ruh ïa u pulit ba tohkit ba un bud ïa ki kyndon bad ka rukom treikam katkum ka Code of Criminal Procedure bad ka Border Security Force Act, 1968. U pulit u lah ruh ban bud ïa ka kyndon 45 Cr.P.C ha kano-kano ka por ba donkam.
