Shillong, Jymmang 29:
Ka Hynñiewtrep Integrated Territorial Organisation (HITO), West Jaiñtia Hills District ha ka Lah Sngi U Blei ka la leit ban tur sha Secretariat ban leit ïakynduh ïa ki 7 ngut ki MLA na Ri-lum Jaiñtia.
Ka jingleit tur jong ka seng HITO ka dei hadien ka jingbym lap ïa kitei 7 ngut ki MLA ha ka ïing sah jong ki kaba don ha Jowai bad Shillong, hynrei ynda ka seng ka la poi ha ka khyrdop jong ka Secretariat, ka seng ka la shah khang lynti noh ha ki pulit bad hadien kata ki pulit ki la pyllait tang ïa arngut ki dkhot ka seng ba kin rung shapoh.
Haba kren sha ki lad pathai khubor hadien ba kitei arngut ki nongïalam jong ka seng ki la mih shabar, ki la ong ba ka jingwan tur jong ka seng ka dei hadien ba ki la leit ban ïakynduh ïa ki 7 ngut ki MLA sha ïing jong ki hynrei kim don. Kumta na ka liang ka seng ki la wan ban kiew noh sha sor Shillong ban leit sha ki ïingsah jong kitei 7 ngut ki MLA hynrei ki khlem ïakynduh satia.
“Hadien ba ngi khlem ïakynduh, ngi la wan noh shane shapoh Secretariat, ka long kaei kaei kaba pynsngewsih ïa ngi kum ki nongïalam jong ka seng napoh West Jaiñtia Hills namar kine ki MLA kiba ngi phah ban ïasaid na ka bynta ka dawbah jong ka Ri Khasi bad Jaiñtia ki khlem shym la kren ïa ka mat thungkam thungjam,” la ong u nongïalam.
Kitei ki nongïalam ki la ong ruh ba kum ka seng ki la sngewkhia ïa kane ka jingbym kren eiei jong kine ki 7 ngut ki MLA napoh Ri Lum Jaiñtia bad ki la ong ba ki khlem phah ïa kitei ki MLA shapoh ïingdorbar thawaiñ ka jylla ba kin leit shong tang ha ka shuki hynrei la phah bad la wan pynjop ïa ki ba kin kren na ka bynta ki mat ki jura kiba u paidbah ka Jaiñtia u thrang.
Kitei ki nongïalam ki la ïathuh ba hadien ka jingïoh ban ïakynduh ïa u MLA ka Raliang Constituency, u Bah Comingone Ymbon ha kaba u la ong ba un sa shimkhia ban kren halor kane ka mat bad na ka liang ka seng ka la kylli ruh na utei u MLA u ba don hapoh ka sorkar la hato u la shim ne em kata ka rai na ka bynta ka bhah thungkam thungjam, utei u MLA u la ong ha ka seng ba haduh mynta um pat shim eiei.
“Ngi na ka liang ka seng napoh West Jaiñtia ha ryngkat baroh ki Unit kiba wan shane, ngi la buh ka jingkyrpad ba u dei ban kren halor kine ki mat kiba donkam”,la ong kitei ki nongïalam.
Kitei ki nongïalam ki la ong ruh ba lada kitei ki myntri ka sorkar kim lah ban kren eiei na ka bynta ka im ka ïap jong ka Jaitbynriew hapoh Jaiñtia, ki dei ban hiar shuki noh bad lada kim leh kumta, kum ka seng ka la buh ka jingbyrngem ba katei ka jingwan jong ka seng ka dei tang ka jingwan ba shisur shidur jong ka seng bad lada kitei ki Myntri kim kren eiei halor ka bhah thungkam thungjam, ka seng ynda ka la wan biang sa shisien kan rah bad tiar bad tar ban ïaleh pyrshah bad kitei ki Myntri namar ki kheiñ snep shuh ïa u paidbah.
“Ki dei ban pyrkhat ïa ka pateng ka ban sa wan, kan jia aiu lada kim don shuh ma ki bad lada kim kren mynta lano pat kin kren halor la dap 50 snem,” la ong kitei ki nongïalam.
Kitei ki nongïalam ki la byrngem da kaba shai ba lada kitei 7 ngut ki MLA ka Jaiñtia kim leh eiei lane kim kren eiei halor kane ka mat, ka seng ka la long kaba la pynkhreh ban ïaleh na ka bynta ka hok kaba dei ban ïoh.
