Jowai, Jymmang 29:
Ka ding jong ka jingdawa ban pynkylla ne pynthymmai noh ïa ka Meghalaya State Reservation Policy (MSRP) kaba la 51 snem ka la pur sa sha Ri lum Jaiñtia haba ki seng hapoh ka lama jong ka Jaiñtia Coordination Committee on Reservation Policy (JCCRP) ki la dawa ba dei ban pynkylla noh mardor ïa ka MSRP ne mad ki jingïakhih kiba jur nangne shakhmat.
Ki seng ba kynthup ïa ka Jaiñtia Students’ Movement (JSM), Jaiñtia Students’ Union (JSU), East Jaiñtia National Council (EJNC), ka Synjuk Waheh shnong ri Jaiñtia bad Synjuk Waheh Shnong Jowai hapoh ka lama Jaiñtia Co-ordination Committee For Reservation Policy (JCCRP) ki la sdang ïa jingïakhih da ka ‘sit in demonstration’ ne shong kyllaiñ mungor ha Stand Taxi Ummulong, Ïawmusiang, Jowai ha Sngi Nyngkong mynta ka taïew.
Haba shim bynta ha ka jingïalang, u nongïalam ka Kiang Nangbah Government College Students’ Union, u Precious Sten u la ong ka Reservation Policy ka jylla ka long kum ka ding kaba thang ïa ka lawei jong ki samla pule.
Une u nongïalam ki samla pule u la ong haba peit ïa ka jinglong jingman ka pule puthi hapoh ka jylla teng-teng ka wan ha ka bor jingmut jingpyrkhat jong ki samla ban ong ba ka jingleit pule ïa ka kyrdan Degree ka long tang ban lait na ka jingshong ïing.
Shuh shuh u la ong ki kmie ki kpa haba ki phah pule ïa ki khun ka jingthmu jong ki, ka long ban ïoh kam ïoh jam bad ban ïoh ki khun ïa ka lawei kaba phyrnai, hynrei sngewsih ba kumba long mynta, ym sngew donkam ban pule namar ka bhah thung kam thung jam ka long kaba noh shilliang.
Nalor kata, une u samla pule u la ban jur ruh ïa ki 7 ngut ki MLA jong ka ri-lum Jaiñtia ba ki dei ban kren eiei halor ka bhah thungkam thungjam ne ka Reservation Policy bad ban dawa na ka sorkar ban bishar bniah ïa kane ka Policy kaba la ktah shisha ïa ki khun samla jong ka ri Khasi Jaintia.
Ki nongkren kynthup naduh ki nongïalam sengbhalang, ki nongïalam shnong, ki ’riew paidbah, ki la ong, ba ha kiwei jylla ki ïaleh katba lah ban review ne pynthymmai man la ka shiphew snem ïa ka Reservation Policy, katba ha Meghalaya pat la sanphew snem kynthih ka ïai neh ïai sah kumjuh.
Kumta ki la kynthoh ruh ïa ki MLA Khasi khamtam ki 7 ngut ki MLA na ri lum Jaiñtia ki bym kren eiei ïa kane ka mat kaba ktah pyrshah ïa u khiewja jong ki paidbah.
Ki la ong ba ka jingsngap jar jong ki nongmihkhmat Khasi ka pynpaw shai ba kim don jingkitlhlieh kum ki nongmihkhmat ba la jied bad pynkhamti ha ki ban trei na ka bynta ka jaidbynriew.
Ki nongkren ki la pynpaw ruh ka jinglyngngoh ba ha ka por ïalap ilekshon ki pyndonkam bakla ïa ka kyntien ‘jaidbynriew’ tang ban khring vote, hynrei ynda la jop pat ki sngap jar jar. Shuh shuh kaba kham thamula ka long ba ka jingkynthup jong ki ïa mat Reservation Policy ha ki manifesto jong ki, ka long tang ka kam pynbieij briew bad shukor ïa ki paidbah.
Baroh ki nongkren ha kane ka sngi ki kynthup ïa u nongïalam barim ka JSU u Rikut N. Parien, u President ka Synjuk Waheh ri Jaiñtia u Army Lipon, u General Secretary ka JSU u Treiborlang Suchen, u president ka JSM u Leningstar Rymbai bad kiwei kiwei ki ai ka jingkyrshan kaba pura ïa u MLA ka Nongkrem u Bah Ardent Miller Basaiawmoit uba la mih shakhmat ban shah thngan na bynta ka lawei jong ki khun samla.
