Agartala, Jymmang:
Ki bor shipai ka Border Security Force (BSF), Tripura ha ki khyndiat sngi kiba la leit noh ki la ïoh ban kem ïa haduh 18 ngut ki runar kiba donkti ha ki kam ban khaïi beaiñ ïa ki masi na shiliang sha shiliang pud.
Ïa kitei ki runar, ki shipai ka BSF ki la ïoh ban kem na ka shnong Shiblong – ka shnong kaba don ha ka thaiñ khappud Tripura-Mizoram. Nalor ka jingshah kem jong kitei ki 18 ngut, ki shipai ka BSF ki la ïoh ruh ban kurup ïa haduh 86 tylli ki masi.
Kat kum ka jingpyllait kyrwoh jong ka tnat shipai, la ïathuh ba katei ka jingjia ka la jia ha ka thaiñ Shibbari – ka thaiñ kaba hap hapoh ka jingkhmih jong ki bor pulit ka Manu police station, Longtorai valley sub-division, Tripura.
Ki bor shipai ka BSF ki la pyntip shuh shuh ba dei ka kynhun shipai na ka 105 Battalion jong ka BSF Tripura, kaba la don bynta ban khmih bniah ïa ki jinglong jingman ha ka thaiñ Shivbari – ka thaiñ kaba marjan bad ka shnong Machalibazar, Dhalai district, Tripura.
Dei ha ka por kumba 4 baje mynstep ba ki bor shipai ki la ïoh ban bat ïa katei ka kynhun khaïi masi beaiñ na katei ka thaiñ. Ha katei ka sngi, ki bor shipai ki la ïoh ban pynsangeh ïa 20 tylli ki kali kit masi kiba la ïalam nakhmat da kawei ka kali Mahindra Scorpio bad ïoh ban kem noh ruh ïa 18 ngut ki runar kiba donkti ha ki kam ban khaïi beaiñ ïa ki masi.
Ki masi kiba la ïoh ban kurup ha katei ka sngi ki shongdor palat T.9 klur.
