US, Jymmang:
Katkum ki khubor la ong ba uwei u khyllung 5 snem na United States, u la hap ban shah sumar kyrkieh ha ka Sngi U Blei hadien ba u la bam bun palat ki ‘Chewing gum’ bad kaba la pynthud ia ka jinglong ka met jong u.
Ia utei u khynnah rit la rah sha ka jaka sumar kaba don ha Ohio hadien ba u la don ia ki dak jingshitom ha ka met jong u namar ka jingbam palat kumba 40 tylli ki chewing gum ha ka sngi ba la leit.
Ha kaba sdang, la ong ba ki nongsumar ki la peit bniah ia ka jinglong ka kpah jong u namar ka jingshitom eh kpoh kaba utei u khynnah u la shitom hadien ba u la leit bam palat ia kitei ki chewing gum. Ia katei ka kynhun sumar la lam khmat da u Dr. Chizite Iheonunekwu jong ka Cleveland Clinic, ha kaba ki la lap bad ioh sei ia utei u jingbam kai ba la sahkut ha ka kpoh jong utei u khynnah da ki sngi.
Haba iadei bad kane, la ong ba ki doktor ha katei ka sngi ki la iakhun shitom ban ioh sei ia utei u chewing gum baroh da kaba thep ia u kynja nar ban ioh boh bad khlong ia utei u jingbam uba sahkut ha ka kpoh jong utei u khyllung. Namarkata, utei u khynnah u la mad pat sa ia ka jingpang ryndang namar ka jingiakhun shitom ban khlong ia utei u jingbam da bun-bun sien.
Ki doktor ki la iathuh ruh ba utei u khynnah 5 snem u dang donbok ba utei u chewing gum um pat shym la set kut ia ka snier bad ka jinglong jingman ha ka met jong u ka dang iaid beit- iaid ryntih hynrei lada dei ba utei u jingbam un set kut ia ka snier, ka jingma kaba khraw ka la ap lypa ia ka jingim jong u.
Ki doktor ki la iathuh ba u chewing gum um ju neh slem ha ka met, bad hadien ba la ioh kum nguid bakla ia u, u ju mih biang noh hadien 40 kynta na ka met jong u briew namar ka snier kam lah ruh ban tylliat ne pyn lwet ia u.
Kumta la ong ba lada ioh ngut kumba 2 ne 3 tylli ki chewing gum ha ka shi sngi, kan pynlong ia ki snier ba kin sahkut bad kin ym lah shuh ban tylliat ia ka bam kaba rung sha kpoh bad kumta kane kan sa wanrah pat ia kiwei ki jingshitom bapher da kaba sdang na ka jingeh kpoh.
