Tura, Jymmang 29:
U MLA ka Rajabala, Dr. Mizanur Rehman Kazi jong ka All India Trinamool Congress (AITC) lyngba ka kyrwoh u la pynpaw ba ka Jylla ka donkam ym tang ban ïakren halor ka bhah thung kam hynrei ban pyntikna ba kane ka jingbhah kam kan long katkum ka hukum ba la pynmih da ka ïingbishar ba hakhlieh duh ka ri.
“Haba ïadei bad ki jingdawa ba la pynsngew da katto-katne ki kynhun seng halor ka ‘Reservation Policy’, nga kwah ban kyrpad ïa u Myntri Rangbah bad ka Sorkar Meghalaya ban khmih bniah ïa ka ‘Reservation Policy’ ba mynta jong ka Meghalaya ha kaba la bhah 85 % na bynta ki ‘SC’/‘ST’ katba kiwei pat ki ïoh tang 15%. Kane ka long pyrshah ïa ka ‘Reservation Policy’ ba la buh da ka ïingbishar ba hakhlieh duh ka India,” la ong u Dr. Kazi ha ka kyrwoh.
Utei u MLA ka AITC u la kdew ïa ka rai jong ka ïingbishar ba hakhliehduh ka ri ha ka mukotduma – Jaishree Laxmanrao Patil ‘Vs’ ka Sorkar Maharashtra bad Indra Sawhney V/s Union of India ha u 1992 ha kaba la buh ïa u pud na bynta ka jingbhah kam ha ki kam Sorkar.
“Ka SC ka la buh ïa u pud bad kam shah ïa kano-kano ka jingbhah na bynta kano-kano ka ‘Tribe’/‘Caste’ palat ïa ka 50%. Kumta ka long pyrshah ïa ka rai jong ka SC. Kumta nga dawa jur na bynta ka jingkhmih bniah bad ka jingbhah kaba 50% na bynta ki ‘Unreserved Category’ katkum ki kyndon ba la buh da ka ïingbishar,” bynrap u Dr. Kazi.
