Shillong, Jymmang 29:
U President ka Hynñiewtrep Youths’ Council (HYC), Bah Robertjune Kharjahrin u la ong ba ka seng ka long ba la kreh lypa ban dawa Hynñiewtrep Land lane kata ka Khasi Jaiñtia State lada ym lah shuh ban pynbeit ïa ka Reservation Policy.
Ha ka sngi Nyngkong ki nongïalam ka HYC ki la leit sha ka jaka shong shah thngan u Bah Ardent M Basaïawmoit ban ai khublei bad ai mynsiem biang ïa u halor ka jingïaleh ban dawa na ka Sorkar Jylla ba kan peit bniah biang ïa ka State Reservation Policy’.
Haba kren sha ki lad pathai khubor hadien ba la dep ban ai khublei ïa u Bah Ardent, u Bah Robertjune u la ong, ka HYC ka long kaba kloi ban ïaphiah noh lada ym lah ban pynbeit shuh ïa kane ka bhah thungkam thungjam hapoh ka jylla.
Nangta, u la ong ba kane ka kam ne ka mat ka dei kaba eh bad kaba khia bha, kaba long ‘sensitive’, kumta donkam ban ïakren bad weng ïa kane ka jingeh khlem da ai ding keiñ, kumba la pynpaw da uwei na ki Myntri Sorkar.
“Ym dei tang phi uba nang ban ai ding, ngi ruh ngi nang ban ai ding,” la ong u Bah Robertjune bad nalor kata u la kyrpad ruh ïa baroh ki MLA bad ruh ki seng bapher bapher ba kin ïaleh bad pyrshang ban weng ïa kane ka jingeh da ka jingïasngewthuh jingmut bad pynshongnia hynrei ym ban ding ne kren lamwir.
Ha kaba ïadei bad ka jingkwah jong ka ACHIK ban wanrah noh ïa ka nongbah ha ka por tlang ne ‘winter capital’ ha Garo, u Bah Robertjune u la ong, “Ngi ruh ngi kwah ban don noh ar tylli ki budget ne ka mang tyngka, kawei ïa ka Rilum Garo bad kawei ïa ka Rilum Khasi Jaiñtia. Ki jingmih na rilum Garo pyndonkam ne pynlut ha Rilum Garo bad ïa ki jingmih na Rilum Khasi Jaintia pyndonkam beit ha Rilum Khasi Jaintia. Ngim treh ban shim na ki jingmih na Rilum Garo bad ha kajuh ka por ngin nym ai ruh shi ana sha ki, bad ïa ka bhah jingïarap ba ïoh na ka Sorkar Kmie ruh dei ban phiah katkum ka jingdonkam bad jingheh.”
