Shillong, Jymmang 29:
U President ka Hynñiewtrep Youths’ Council (HYC), Bah Robertjune Kharjahrin u la ong ba ka jingdawa jong u President ka Voice of the People Party (VPP) halor ka jingpynbeit bad pynkylla ïa ka bhah thung kam hapoh ka jylla kam dei ka mat ka ban pynïoh jingmyntoi ne pynïohnong ïa kano kano ka seng saiñ pyrthei, hynrei ka dei ka mat kaba kum ka jaidbynriew ka la angnud la slem bah.
Haba kren bad ki lad pathai khubor ha ka sngi Nyngkong, u Bah Robertjune u la ong, lada phai sha ka histori jong ka Job Reservation Policy, kane ka dei ka jingdawa bad ka jingthrang jingangnud jong ka jaidbynriew la kham slem. U la pynkynmaw ruh ba ha ki por ba la leit ki la don bun ki jingïakhih bad ki jingshah thngan bad ka jingkhie im biang jong kane ka mat ka dei na ka daw ba ka sorkar jylla ka pyrshang ban pyndonkam bakla ïa ka Roster System.
Nangta, u la ong ruh ba ka jingleh jong ka sorkar da kaba pyntreikam ïa ka Roster shadien ka wanrah ka jingduhnong ïa ka jaidbynriew bad ong ba kane ka policy ka dei kaba la noh shiliang lypa, kaba la rim bad ka bym ïahap shuh kaba katkum ka juk mynta bad ka dei ka rukom treikam kaba la pynwandur ban pynïohnong beit thik tang ïa kawei ka jaidbynriew. Kumta ka la donkam ïa ka sorkar ban pynbeit noh ïa kane ka Policy.
Namar kata, u la ong ba la donkam ban pynbeit noh, namar lada peit ïa baroh ki policy kiba don, la peit bniah man la ka 10 snem, te kan leit khyllah leh aïu kane ka policy ban nym lah pynbeit.
Haba kylli aïu ka seng ka don ban ong halor ka jingbym khot ïakren ka Sorkar wat haba la shong shah thngan haduh 7 sngi, une u nongïalam ka HYC u la ong, ka jingbym khot ka sorkar ban ïakren, ka jubab baroh ki tip, ba lada ka sorkar ka pyrshang ban pynbeit ïa ka kam, kan don kawei pat ka jaidbynriew ban pyrshah.
Nalor kata, u la ong wat ki Myntri sorkar ki kren halor kane ka kam, kim kren shuh kum ki Myntri Sorkar hynrei ki kren beit kum ki Garo, bad ka jingong ba ka jingshah thngan ka dei ka jingai ding, ka la dei lypa ka jingkren ïashah liang jaidbynriew lajong. U la ong ba kawei ruh ka daw jong ka jingbym khot ïakren ka dei beit ban myntoi ha ka saiñ hima, namar dei na kane ka kam, ba ki la jop bun ha kane ka ilekshon, ha kaba ki la pyndonkam bakla ïa ka mat ‘roster system’.
