Shillong, Jymmang 29:
U Bah Amazing Kurbah uba dei u nongkyrshan ba hakhmat eh jong u MLA ka Sohïong konstitwensi, u Bah Synshar Kupar Roy Lyngdoh Thabah, u la ong ba shipawa lane tam ki paidbah ka Sohïong ki dei kiba la ai ka jingshaniah ha u bad kumta lada u hap ban mih noh na ka seng UDP kum u nongkyrshan ruh un mih da ka jingïashim rai lang ryngkat bad ki paidbah ban ïa mih ryngkat napoh ka seng.
Haba kren sha ki lad pathai khubor ha ka Lah Sngi U Blei, u Bah Amazing u la ong ba ka jingwan ai jingkyrshan jong u ïa u Bah Ardent Miller Basaïawmoit ha ka jingshong shah thngan hajan ka Additional Secretariat mynta la jan shi taïew ka dei da ka jingkylluid mynsiem bad ba u don ka mynsiem kaba sngewkhia na ka bynta ka Jaitbynriew.
U la ong hadien ka jingshongkai jong u bad u MLA ka Voice of the People Party (VPP) na North Shillong konstitwensi, u Bah Adelbert Nongrum, ha kaba u la ong ba ïa katei ka jingïakhun ban pynbeit ïa ka bhah thungkam thungjam lane ka Reservation Policy yn ïakhih haduh ban da ïoh ïa ka jingjop, ka la rung hapoh ka mynsiem jong u ban ai ka kti kamon ka kti kadiang da kaba pyllait por ban wan ha katei ka jaka.
“Ki don ki sngi ba nga leit mynstep bad nga wan biang janmiet bad nga sahmiet, haduh ban da kut kane ngan ai ka jingkyrshan namar kane ka mat ka dei shisha ka mat kaba eh haduh katta katta ha kaba ïadei bad ka thungkam thungjam,” la ong u Bah Amazing.
U Bah Amazing u la ong ba ka sorkar Meghalaya Democratic Alliance-II ka la pyneh dohnud haduh katta katta ban pynbeit ïa ka bhah thungkam thungjam bad u la ong ba ka jingpynslem jong ka sorkar ban pynbeit ïa kane ka mat um tip na ka daw aïu hynrei katkum ka jingbatai jong u MLA ka Sohïong uba la ong sha u ba yn shim ïa ka rai lyngba ka kynhun jong ka UDP ha ryngkat bad baroh ki MLA ka UDP.
“Katno sien shuh nga la phone bad nga la pynbor ba u dei ban wan ai jingkyrshan ïa kane hynrei haduh mynta ka sngi ruh ngam pat ïohi ba un wan ai jingkyrshan ha kaba ïadei bad kane ka mat. Nga la dep ong bad batai ïa u ban weng noh ïa kata ka jingsngew seng namar kane ka dei ka mat ban ïakhih na ka bynta ki khun samla ka jaitbynriew ka jong ngi,” la ong u Bah Amazing.
Haba kylli la hato un weng noh ka jingai jingkyrshan jong u na ka seng UDP hadien ka jingbym kren eiei jong u MLA ka Sohïong halor ka bhah thungkam thungjam, u Bah Amazing u la ong ba ïa ka vote jong u kaba u la dep ban leit thep un nym lah shuh ban leit sei kaba mut mynta baroh 5 snem un don beit bad ka seng UDP tangba kum u nongleit ïalap ilekshon na ka bynta ka seng UDP bad u MLA ka Sohïong, u khlem khmih lynti eiei pat ba utei u MLA un leh bha lane un ai spah ïa u hynrei tangba u la dep pynjop ïa utei u MLA u la hun ïa kata.
“Mynta ïa ka ban shim ïa ka rai la ngan neh ne ngan phet ngam pat shim hi ruh ïa kata namar ki paidbah jong ka Sohïong kumba shipawa lane tam ki la dei kiba la ai ka jingshaniah ïa nga bad kumta ngi hap ban ïa rai lang bad lada ngi dei ban leh, ngin ïaleh ryngkat bad lada ngi dei ban hap mih ruh, ngin hap ban mih ryngkat,” la ong u Bah Amazing.
Shuh shuh u Bah Amazing u la ong ba na ka liang jong u, u la kyrpad ïa u Bah Synshar ba u dei ban ai jingkyrshan ïa ka jingdawa jong ka seng VPP bad ba u dei ban weng shwa ïa ka jingsngew seng bad ba u dei ban shim ba u dei u jaitbynriew Khasi uba im hapoh ka Bri u Hynñiewtrep.
“Ngin sa ïa peit ïa ka rukom leh ynda la long ka ïingdorbar thawaiñ bad mynta nga kwah tang ïa kata hi hynrei u jong ngi te u sngap man-man”, la ong u Bah Amazing.
