Guwahati, Jymmang:
Ki bor pulit jong ka jylla Assam ha ka 29 tarik mynta u bnai ki la pyntip ba haduh 7 ngut ki samla pule jong ka Assam Engineering College, Guwahati ki la duh ei ïa la ka jingim na ka jingtyngkhuh kali ha ka miet jong ka Sngi U Blei ba la dep. Ki bor pulit ki la pyntip ba kitei ki 7 ngut ki samla pule ki dei ki samla pule kiba shong ba sah ha hostel no 7.
Ki bor pulit ki la pyntip ba katei ka jingjia ïatakhuh kali ka la jia ha ka miet jong ka Sngi U Blei hapdeng ka kali Scorpio bad ka kali Bolero. Na ka liang ki bor pulit ki la suba jur ruh ba u samla u ba la ñiah ïa ka kali Scorpio u don hapdeng ka jingshoh khawiang, bad dei na ka daw jong ka jingbym lah tehlakam jong u ïa ka kali ba ka la leit ban ïatakhuh ba ka kali Bolero pick up truck.
Katei ka jingjia ka la jia hajan ka Jalukbari flyover, Guwahati, Assam.
Ki 7 ngut ki samla pule kiba la duh ei ïa la ki jong ki jingim na katei ka jingjia ki kynthup ïa u Imon Baruah na Dibrugarh, Kaushik Mohan (Sivasagar), Arindam Bhuwal (Guwahati), Niyor Deka (Guwahati), Upangshu Sarma (Nagaon), Rajkiran Bhuyan (Majuli) bad u Kaushik Baruah (Mangaldoi).
Kat kum ki jingïoh lum jingtip la ïathuh ba ha ka por ba jia katei ka jingjia, ki don 10 ngut ki samla pule kiba la ïashon da katei ka kali. Ïa ki 3 ngut kiba la ïoh ïa ki jingmynsaw kiba jur la leit ban pynkit noh mar mar sha Guwahati Medical College and Hospital (GMCH).
