Lausanne, Jymmang:
Ha ka sngi sam ia ki khusnam bapher bapher sha ki nong-ialehkai phutbol kaba dang shu dep ban pynlong, ka khubor ka iathuh ba u khlur ialehkai jong ka klob Paris Saint-Germain u Kylian Mbappe u lah shah jied kum u nongjop ia ka khusnam ‘Player of the Season’ jong ka lympung ialehkai ba paw ka ri France ka Ligue1, bad ka long ruh ka sien kaba saw ha kaba utei u rangialehkai u lah ioh ban khur ia ka khusnam.
Ka jingshah jied ka jong u na ka bynta ban khur ia katei ka nam ka long hadien ba u lah iarap ia ka kynhun ialehkai ka jong u ban khur ia ka rekod jingjop ba 11 na ka lympung; ha kaba kat haduh mynta utei u khlur ialehkai na France u la lah ban kamai haduh 28 kol ha ka lympung ha ka pateng ba mynta bad uba dang don ruh ka jingiaid lynti na ka bynta ban khur ia ka nam kum uba hakhlieh tam eh ha kaba iadei bad ka jinglah ban khur bun kol na ka bynta ka jingiaid lynti ba mynta jong ka aiom ialehkai kaba san.
U Mbappe u lah pynpaw ba ka long ka jingkmen kaba khraw ha kaba un khur biang sa shisien ia katei ka nam bad ban iai thoh ia ka kyrteng jong u ha ka khana-pateng jong katei ka lympung ialehkai. Hynrei napdeng baroh ki jingthmu kiba u don, um shym la khmih lynti ba un long uba kloi ban khur kum u nongjop.
Shuh shuh kum u rangshutbol ba paw katei ka kynhun, u Mbappe ha ka jingiaid lynti ha ka aiom ialehkai ba mynta, u la lah ban kamai haduh 40 kol, da kaba pynpulom noh ia ka Real Madrid ha kaba kut jong ka aiom ialehkai ba lah dep kaba lah kwah ban tan ia u shalade, hadien ba utei u rangialehkai u lah soi ia ka jingiteh kontrak ba thymmai kaba lai snem kynthih bad ka PSG ha kaba katei ka jingiateh ba thymmai ka jong u kan kut noh ha u snem ban wan tad haduh ba un da pyntreikam pat ia ka lad ka lynti kaba u don na ka bynta ban iaisah biang bad ka kynhun haduh u snem 2025.
U Mbappe u long ruh uba nyngkong napdeng ki nongialehkai ban khur ia katei ka nam haduh saw sien hadien ba u lah dep ban khur ia ka ha ka sien kaba nyngkong ha u snem 1994 da kaba tam noh shakhmat ia u Zlatan Ibrahimovic; uba lah rah ia katei kajuh ka khusnam haduh lai sien ha ki lai samoi ialehkai ki jong u ha ka PSG.
Kiwei pat ki khusnam ba lah sam ha katei ka juh ka sngi ki long ka ‘ Coach of the Season’, ha kaba u Franck Haise na ka klob Lens u lah shah jied ban khur ia katei ka khusnam hadien ba la lah ban ialam ia ka kynhun shaduh ka kyrdan ba-ar bad jingioh ruh ban phai biang mynta sha ka lympung Champions League ha ka sien kaba nyngkong ha ki ar pateng jingiaid lynti jong ka klob. Shuh shuh ruh u nongapkol jong ka klob Lens u Brice Samba u lah shah pynkupburom da ka khusnam; katba u rangialehkai shadien jong ka Paris Saint-Germain u Nuno Mendes u lah khur mynta ia ka khusnam ‘Best Young Player’ bad uba lah long ruh uwei na ki saw ngut ki rangialehkai ka PSG ha ka kynhun baroh kawei jong ka aiom ialehkai ha ryngkat bad u Mbappe, Lionel Messi bad Achraf Hakimi.
