London, Jymmang:
Ka kynhun ialehkai Hockey ki shynrang jong ka ri Bilat ka Great Britain ka lah knieh noh mynta ia ka kyrdan ba nyngkong na ka India ha ka miej khein dor-thong ha ka FIH Hockey Pro League, hadien ba katei ka kynhun ka la lah ban khur noh shalade ia ki 4-2 kol jingjop.
Shuh shuh ruh ka khubor ba lah ioh lum ka iathuh ba dei ki kol na u Timothy Nurse (7min), Thomas Sorsby (32min), Lee Morton (34min) bad Nicholas Bandurak (54min) kiba lah pynlong ia ka tei ka kynhun ia aireng ha-la-iing ban iai jam shuh shuh shakhmat ha ka lympung; katba ki kol ba ka kynhhun India ka lah ioh ban khur ki long lyngba u kapten jong ka u Harmanpreet Singh (14 & 43 min) bad kitei ki ar kol ki lah pynlong ia u ban khur ia ka nam kum u ‘All-time Best Goal Scorer’ ha katei ka lympung ialehkai ha ryngkat bad ki 35 kol kiba u don. Haba phai sha ka jingiakhun, ka GB ka lah ioh ban pynher sted ka rukom ialehkai jong ka da ka jinglah ban iaknieh bol shakhmat kaba lah pynjem ia ki khnap ialehkai jong ki rang ka India kiba ia aireng shakhmat. Shuh shuh ruh watla ka kol ba nyngkong jong ka Great Britain ha ka 7 min ialehkai ba ka lah khur, ka lah buh ia ka kynhun India ha ka jingialeh ba kan hap ban iakhun da kaba tyngeh na ka bynta ban khyllie pat ia kata bad kaba lah iohlad ban leh ia kata ka bynta ha ka por ba u Mandeep Singh u lah ioh ban tied ia ka Penalty Corner.
Hynrei da ka jinglah ban tied kynting ia ka bol, ha ryngkat ba ki 11 kol haduh mynta ha ka lympung, u Harmanpreet u lah pyndonkam da ka drag-flick kaba khlain na ka bynta ban shem ia ka lynti ha ka ban tied pynrung ia ka bol shapoh ka jar lyngba u nongapkol ka GB u James Mazarelo. Kumta ka kol ha ka 14 min ka lah pynlong ia ka India ba kan ialehkai bha bad pynleit jingmut ha ka jingiakhun na ka bynta ki quarter iakhun ba hadien ha kaba ka lah ioh ruh ban tunjuh ia ka kynhun defence jong ka kynhun iakhun pyrshah ha ka jingwad ia ki lad ki lynti na ka bynta ban thaw halade ia ki PCs.
Kumta watla ka lah ioh ban thaw halade ia ki lai tylli ki PCs kiba biang, hynrei katei ka kynhun kam shym la lah pat ban pynurlong ia kita baroh sha ka jinglah ban kamai kol ha ka jingiakhun. Kumta katba ka jingiakhun ka dang iaid shakhmat, ka GB ka lah iohlad ban rah ia ka bol bad ha ka 28 min ialehkai ka lah kyntait noh ia ka India kum ka nongtam kol shakhmat; ha kaba ka lah kyntait ia ka kol ba ka lah thep naba kata ka kol ka leit rung hapoh ka jar da kaba tied ia ka bol da ka bynta ba shadien jong u dieng ialehkai.
Katba ka jingiakhun ka dang iai tyllun shakhmat sha ka quarter ba khatduh, ki ar kynhun ialehkai ki lah nang iai kyntiew ka rukom ialehkai jong ki da kaba sei katto katne ki bynta ialehkai ba tbit jong ki.
Hynrei tang 90 sekhon sha ka quarter, ka GB ka lah ioh ban khur ia ka PC hynrei u rangapkol ka India u Sreejesh u la lah ban ialehkai bha da kaba tied noh ia ka bol shabar na ka kol. Kumta katba ka jingiakhun ka dang iai jwat sha ka kynhun defence jong ka India, ka GB ka lah wan shakhmat da ka jinglah jong ka ban tur ialeh shakhmat haduh ba kan da ioh ban thep kol biang sa shisien ha ka 54 min ialehkai. Hynrei dei u Nicholas Bandurak uba lah pynioh kol sha ka kynhun ialehkai baroh kawei kaba lah pynlong ia ka GB ban tam kol shakhmat da 4-2. Da katei ka jingjop, ka GB ka lah thikna ruh na ka bynta ban khur ia ki 3 dor-thong.
Hadien katei ka jingshah pynrem, ka India kan hap ban pynkhreh bha shuh shuh na ka bynta ban ia aireng pat sa bad ka Belgoum ha ka 2 tarik u bnai ban wan.
