Shillong, Jymmang 29:
Ka jingap khmih lynti ka Ladthalaboh ban rung sha ka semi final ha ka Meghalaya State League ka la poi sha kaba kut hadien ba mad jingshah rem biang sa ha ka Niaw Wasa United da 5-0 kol ha ka Group-B.
Ha kane ka jingïakhun kaba la long ha Kiang Nangbah Stadium kaba ha Jowai, u rangïalehkai ka Niaw Wasa, u Jeffree Surong (4′, 7′, 45’+3, 70′) u la ïoh ban khyrwit marwei haduh saw kol, katba ïa kawei pat la pynbud da u Owanijuh Pajuh (68′).
U Jeffree u la ïoh ban thep ar kol tang haduh 8 minit bad u la lah ban khur ïa ka hat-trick hadien ba u ïoh ban thep biang ïa ka kol balai shwa ban kut ka jingïalehkai jong ka kylla step.
Ha ka jingshisha ka Ladthadlaboh ka la ïoh ïa ki katto katne ki kabu kiba biang, hynrei kam shym la lah ban pynurlong. Ka Niaw Wasa ka la ïoh ban thep biang sa ar kol ha ka kylla miet ha shwa ban khur syndon ïa ka jingjop.
Lyngba kane ka jingjop, ka Niaw Wasa kaba long lahduh ha ka MSL 2017, ka dang don hapdeng ka jingïaknieh ban ïoh rung sha ka semi final.
Hadien ki hynriew sien ïakhun, ka Ladthadlaboh ka la ïai sah hi 10 point hadien ba shah rem ar sien. Ka Niaw Wasa kaba la don mynta ha ka kyrdan basaw bad kamai 9 point, ka dangsah ka jingïakhun kaba khatduh pyrshah ïa ka Rangdajied United, kaba la kamai 10 point bad dangsah sa ar sien ïakhun. Ka Niaw Wasa bad ka Mulait United ki la kamai mar 9 point, hynrei ka Mulait ka la wan kham ha shwa hadien ba ka la tam lyngba ka jingïapher kol.
Ha ka jingïakhun jong ka Group-C kaba la long ha madan MDSA kaba ha Mawkyrwat, ka Riangdo ka la pynliem noh ïa ka Lumdiengngan da 4-1 kol.
U Stepping Stone Wanshong u la ïoh ban pynkhih jar nyngkong eh na ka bynta ka Lumdiengngan ha ka minit kaba 36, hynrei u Banshynshar Ïawphniaw (40′) bad u Sylvester Thongni (41′) ki la lah ban pynphai kylla ar kol na ka bynta ka bynta ban pynlong ïa ka Riangdo ban tam da 2-1 kol.
Ka Riangdo ka la ïoh ban thep biang sa ar kol ha ka kylla miet lyngba u John Kerry Wanñiang (49′, 86′) na ka bynta ban khur syndon ïa ka jingjop.
Kumba ka paw ka Seven United ka la dangïai bat ïa ka kyrdan ba hakhlieh ha kaba ka la kamai 8 point, hynrei ka Riangdo ka la kamai 6 point bad ka la ïalehkai lai sien, katba ka Seven United ka la ïalehkai saw sien. Katba ka lahduh jong ka MSL 2019 ka Shillong Lajong, ka la lah ban ïalehkai bha ha ki ar sien ïakhun ha kaba ka la lah ban thep haduh 13 kol ban ïa ka Riangdo na ka bynta ban ïai sah ha ka kyrdan ba-ar.
Ha ka jingiakhun jong ka Group-D kaba la long ha Chandmari Ground kaba ha Tura, ka Khliehmawlieh Youth Club ka la lah ban pynliem noh ïa ka Wasa FC da 4-1 kol.
Da kane ka jingjop ka Khliehmawlieh ka la jam sha ka kyrdan ba hakhlieh ha kaba ka la kamai 10 point, katba ka Wasa FC kaba la wan ba-ar ka la kamai 7 point.
U Andistar Rashir u la ïoh ban pynkhih jar nyngkong eh na ka bynta ka Khliehmawlieh ha ka minit kaba lai hadien ba u la ïoh ban shut ïa ka free-kick hashwa ban u S. Kharshilot un thep ïa ka kol kaba nyngkong ha ka minit kaba
28. Hadien shiteng kynta u Koushik Rabha (33′) u la ïoh ban thep kol na ka bynta ka Wasa.
Hadien ba la bteng ïa ka jingïakhun jong ka kylla miet, u Kharshilot (66′) u la thep biang sa shi kol bad hadien ba la thep sa u Maining Marngar (76′) na ka bynta ban khur syndon ïa ka jingjop.
Haba phai sha ka jingïakhun jong ka Group-A kaba la long ha madan Third Ground, ka Langsning ka la pynjem khnap ïa ka Seng Samla Laitryngew haduh 11-0 kol.
U Dauruhipaia Pale (8′, 83′, 88′) bad u Ambilstar Sun (29′, 48′, 50′) ki la khur ïa ka hat-trick hadien ba ki la ïoh ban thep mar lai kol. Ïa ki ar kol la thep da u Kynsaibor Lhuid (18′, 78′) bad u Wilbert Marbaniang (64′, 90’+1), katba ïa ka shi kol la thep da u Fedrick Wahlang (89′) na ka bynta ban pynlong ïa ka Langsning ban kamai 9 point na ki saw sien ïakhun, hynrei ka dangduna salai point ïa ka Mawlai (12 point), kaba danglamkhmat ha kane ka lympung.
