Tura, Jymmang 29:
Ka kynhun jong ki seng ba paw na Ri-lum Garo ki la rai lang ban kyntait ïa ka jingkhot jong ka Sorkar ban ïakren halor ka Reservation Roster haba dawa ruh ïa ka Sorkar Jylla ba kam dei ban pynkhih ïa ka jingsam bhah jong ka State Reservation Policy.
Kane ka kynhun jong ki seng kaba la ïakynduh lang ha ka sngi Nyngkong ha Tura ka kynthup ïa ka Garo Students’ Union (GSU) CEC, Garoland State Movement Committee (GSMC), A’chik Youth Federation William Nagar (AAYF), AAYWS bad kiwei kiwei. Ïa kane ka rai la shim hadien ba ki la dep ban ïatai sani halor ka jinglong jingman halor ka Roster System hapoh ka Jylla.
“Kum ka kynhun jong ki seng na Ri-lum Garo da kawei ka sur ngi la ïashim ïa ka rai ba ngin nym leit ïashim bynta sha ka jingïalang ba la khot da ka sorkar ban ïakren halor ka Roster System kaba la buh ban long ha Shillong ban pynïaid da u Myntri Rangbah ka Jylla u Conrad K Sangma,” la ong ka kyrwoh khubor ba la pyllait da kine ki seng.
Nangta, kine ki sengbhalang na Ri-lum Garo ki la ïamynjur lang da kawei ka sur, ba kumba ka la long baroh shi katta, ka dei ban ïaid beit ruh kumta ka bhah thungkam thungjam ne ka State Job Reservation Policy ha Meghalaya bad kam dei satia ban don kano kano ka jingpynkylla. Namar kata, ki ïeng skhem ha ka nongrim ba ym dei ban leh shiliang ha ka jingthungkam katkum ka Roster la ka dei kaba treikam naduh ki snem ba la leit noh ne nangne shakhmat.
Kitei ki seng ki la dawa ruh ban kynthup lang ïa ki jingbym lah pyndap ïa ka jingïoh kam ki paid Garo ha ki snem ba la leit (backlog) haba ban jur ban ïaid katkum ki jingkheiñ jingdiah kiba paka.
Nalor kata, ki la pynpaw ruh ïa ka jingkut jingmut ban ïeng ïada pura ïa ka hok bad ka bha ka miat jong ka jaidbynriew ba ki mihkhmat. Dei na kata ka daw ki la kren da kaba shai kdar ba lada donkam kin ym artatien ban pynlong ïa ki jingïakhih bapher bapher ban pyntikna ïa ka jingpyntreikam ba khlem shah liang ïa ka Reservation Roster System.
