Shillong, Jymmang 29:
Ka lympung ïalehkai Chief Minister’s State Level Inter School Athletic Meet 2023 ban pynïaid da ka tnat ïalehkai ka Sorkar Jylla kan sdang naduh ka Sngi Balang ha shlem ai jinghikai jong ka Sports Authority of India (SAI) Training Centre, Shillong.
Ïa kane ka lympung ïalehkai ka ban neh lai sngi lynter, yn wan ban plie da u Myntri ka tnat ïalehkai u Bah Shakliar Warjri ha ka jingïadon lang ka Director ka tnat ïalehkai ka Kong Isawanda Laloo bad kiwei.
Ka jingpynlong ïa kane ka lympung ka la wan hadien ba baroh ki district jong ka Jylla ki la lah ban pynlong ïa ka District Level Inter School Athletic Meet bad ki la ïoh ruh ban jied ïa ki nongïalehkai kiba kynsai ki ban mihkhmat sha kane ka lympung.
Ïa kane ka lympung la phiah ha ki lai tylli ki kyrdan ïalehkai jong ki khynnah shynrang bad kynthei kiba kynthup ïa ka Under-14, Under-16 bad Under-18. Ki jingïalehkai ki kynthup ïa ki jingïakop mareh bapher bapher, Long Jump, High Jump, Shot Put, Discuss bad Javelin throw. Ïa kane ka lympung yn pynkut ha ka 2 tarik u Jylliew.
Kum ban shu pynkynmaw ha u snem ba la dep, ka North Garo Hills ka la rah ïa ka nam lahduh ha ka sien kaba nyngkong eh da kaba khur haduh 22 tylli ki takma (11 ki takma ksiar, 6 ki rupa bad 5 ki rnong). Katba ka East Khasi Hills ka la wan ha ka kyrdan ba-ar da kaba khur 18 tylli ki takma (10 ki takma ksiar, 5 ki rupa bad 3 ki rnong). Katba ka lahduh jong u 2019, ka Ri Bhoi District ka la wan balai da kaba khur 31 tylli ki takma (8 tylli ki takma ksiar, 9 ki rupa bad 14 ki rnong).
