Shillong, Jymmang 29:
Ka Sorkar Jylla ha ka sien kaba ar, ka la phah shithi biang sha ka Voice of the People Party (VPP) ban khot ïashim bynta ïa ka seng ha ka jingïalang banyngkong jong ka komiti kaba la thaw halor ka ‘Roster System’ kaba la long ha ka Lah Sngi U Blei.
“Hynne mynstep ngi ïoh ka shithi na ka liang ka Sorkar ha kaba ka la khot ïa u Bah Ardent M. Basaïawmoit. Nga tharai phi la ïohi ba ki la kynthup ïa u kum uwei na ki dkhot jong katei ka komiti ban ïakren mynta ka sngi ha ka por 4 baje,” la ong u MLA ka Mawlai, Bah Brightstarwell Marbaniang haba kren sha ki lad pathai khubor.
Haba pynkynmaw ba la shu kynthup kumto ïa ka kyrteng u Bah Ardent hapoh katei ka komiti, u la ong ba ka seng ha ka Sngi Thohdieng ka la shong-pyrkhat bad pynkhreh ïa ka shithi ban phah sha ka Sorkar kaba kdew shai ba u Bah Ardent u la kyntait ban ïadon bynta ha katei ka komiti.
U Bah Marbaniang u la ong ba ka VPP naduh kaba nyngkong kam treh ïakren haba ïadei bad ka ‘Roster System’ namar ïa kane dang pynshong nongrim ha ka ‘Reservation Policy’ kaba mynshuwa bad kaba noh shiliang.
“Kumta na ka liang jong ngi, ngi la ong ba ngim treh ban ïadon bynta bad kane ka komiti,” u la ong.
Haba kylli, u la ong ba ka seng kan dang bteng ïa kane ka jingïakhih wat la u la pynpaw ka jingsngewsih ba ka Sorkar ka dang kuman sah haduh mynta naba kam pat pyni ïa ka jinglong kloi ban khot ïakren ïa ka VPP halor ka ‘Reservation Policy’.
Halor ka jingbym kren ki 31 ngut ki MLA Khasi haba ïadei bad katei ka mat, u la ong, “Halor kita ki 31 ngut, u paidbah u dei ban buh jingkylli ïa ki. Ki leit sha u paidbah halor kane hi…ban khmih bniah ïa ka ‘Reservation Policy’ hynrei haduh mynta kaba sngewsih ka long ba ym pat don mano-mano ba wan shakhmat ban ong ba ngin ïatreilang ban pynurlong ïa kane ka mat.”
Shuh shuh haba bynrap ba kiwei-kiwei ki jaidbynriew haba poi ïa ka mat kaba ktah ïa ka jaidbynriew ki ïatyllilang kawei, utei u nongmihkhmat ha kawei ka liang u la ong, “Kaba sngewsih na ka liang jong ngi, kita kiwei pat nga i kumba ki kren lang da ka sur jong kiwei. Kata ka jingkylli nga ieh ha u paidbah, namar dei u paidbah uba pynshong ïa ki ban kren na bynta ka jingeh u paidbah. U paidbah u donkam ban kylli jingkylli ïa kita kiba mihkhmat ban kren hapoh ïingdorbar thawaiñ.”
