Shillong, Jymmang:
Ka Reserve Bank of India, Shillong ha ka 25 bad 26 tarik mynta u bnai ka la pynlong ïa ka ‘block level quiz’ jong ka All India Quiz on Financial Literacy 2023 na ka bynta ki khynnah pule kiba hapdeng ka Klas VIII-X na ka bynta ki 8 tylli ki ‘block’ kiba don ha ka thaiñ East Khasi Hills District, kata, ka Shillong Municipal & Cantontment, Mawphlang, Pynursla, Mawlai, Mylliem, Mawrynkgneng, Mawsynram bad Shella Bhollaganj. Ïa katei ka jingïakyntip la pynlong ha ka Conference Room jong ka Reserve Bank of India, Shillong. Ki kynhun kiba la wan ban ïashim bynta ha katei ka rynsan ïakop ki kynthup ïa mar 2 ngut ki khynnah pule kiba mihkhmat na ka bynta ki skul sorkar bapher bapher iba don ha kitei ki ‘block’.
Ïa katei ka rynsan ïakop la pynlong kum shi bynta ban pynsngewthuh paidbah halor ka mat kaba ïadei bad ka jingpynkup bor shuh shuh ïa ki lad ki lynti kiba ïadei bad ka jingnang jingtip shaphang ka pisa pilaiñ (financial literacy) kaba dei shi bynta na ki lad ki lynti ban kyntiew kyrdan ïa ka ri. Ha katei ka rynsan, la buh ïa ki jingkylli halor ki mat kiba ïadei bad ki lad treikam jong ki ïing kynshew pisa bad kumjuh ruh halor ki mat kiba ïadei bad ka ïoh ka kot kynthup ruh halor ka mat ba ïadei bad ka G20.
La wan ban ïashim bynta da ki 13 tylli ki skul na ki ‘block’ bapher baper jong ka thaiñ East Khasi Hills District. Ïa ki kynhun kiba la ïoh ïa ka nam lahduh la pynkup burom bad sam da ki ‘trophy’ bad kumjuh ruh da ki syrnot ïashim bynta. Ïa ki kynhun kiba la ïoh rah ïa ka kyrdan ba nyngkong, ba ar bad balai la sam da ka pisa kaba mar T.5,000, T.4,000 bad T.3,000.
Ki nongjop na mar ki ‘block’ kin ïoh ïa ka lad ban ïakhun ha ka ‘District level’ bad ïa ka rynsan jingkyntip yn pynkut ha ka ‘National level’ hadien ba la lah ban pynlong ïa ka District, State bad Zonal level. Na ka liang ki nongwanïashim bynta bad ki nonghikai na ki skul bapher bapher jong ka thaiñ East Khasi Hills District ki la ai ïa ka jingïaroh kaba khraw ïa ka RBI kaba la lah ban pynlong ïa katei ka rynsan jingïakyntip.
