Imphal, Jymmang:
U Myntri Rangbah jong ka jylla Manipur, u N Biren Singh hadien ka jing-leit ïashim bynta ha ka jingïalang bad u khlieh duh ka tnat shipai Indian Army – General Manoj Pande u la pyntip ba na ki sienjam kiba la shim ban wanrah biang ïa ka suk ka saiñ, ki la don haduh kumba 33 ngut ki dkhot seng kieng atiar kiba la shah siat ïap ha ki bor pahara jong ka jylla.
Haba ïakren bad ki lad pathai khubor, na ka liang u Myntri Rangbah u la pyntip ba kitei ki 33 ngut kiba la shah siat ïap ki dei ki dkhot jong ki seng kieng atiar kiba dang don hapdeng ka soskular sangeh ïasiat (suspension of operations).
Na ka liang u Myntri Rangbah u la pyntip shuh shuh ba ka sorkar ka dang pynïaibteng ban shim ïa ki sienjam ban khynra bad kem pyrshah sa ïa kiwei kiwei ki runar kiba donkti ban thombor pyrshah ïa ki nongshong shnong ‘riewpaidbah jong ka jylla.
Ha ka jingïalang, u Myntri Rangbah u la pyntip ba ka jingjia ïather kuli ka la jia hapdeng ki bor pahara bad ki dkhot seng kieng atiar kiba dang don hapoh ka soskular sangeh ïasiat. Na ka liang u MyntriRangbah u la kyntu ruh ïa ki nongshong shnong jong ka jylla ba ki shaniah skhem ïa ki sienjam kiba ka sorkar jylla lem bad ka Sorkar Pdeng ka la shim na ka bynta ban wanrah biang ïa ka shong suk shong saiñ ha Manipur.
Kat kum ki jingïoh lum khubor la ïathuh ba na ka liang ki bor shipai ka Indian Army bad Assam Rifles ha ka 27 tarik mynta u bnai ki la leit ban pynlong ïa ki jingkhynra kiba jur pyrshah ïa ki dkhot seng kieng atiar ha ka thaiñ Kangchuk, Motbung, Saikul, Pukhao bad Sagolmang.
Kat kum ka kyrwoh ba la pyllait da ka tnat shipai la ïathuh ba ïa kitei ki jingleit khynra ha ka 27 tarik la leit ban pynlong kum shi bynta ban tehlakam ïa ka shong suk shong saiñ ha ka jylla. Ka tnat shipai ka la pyntip ruh ba ha katei ka jingleit khynra la pyndonkam da ki kor ki bor kiba kat kum ka teknoloji jong ka juk stad kaba mynta – khamtam ha ka jingleit khynta ha ki thaiñ ba long lum.
Ha ka jingïalang kaba la pynlong ha ka 28 tarik mynta u bnai, la ïathuh ba na ka liang u General Manoj Pande u la ïakren halor ki mat kiba ïadei bad ki jinglong jingman jong ka jylla ha kine ki por kiba mynta bad kumjuh ruh halor ki sienjam kiba ka tnat shipai ka la lah ban shim na ka bynta ban wanrah biang ïa ka shong suk shong saiñ ha ka jylla. Ka jingïalang hapdeng u General Manoj Pande bad u Myntri Rangbah ka jylla ka la neh haduh kumba 1 kynta eiei.
Kat kum ki jingïoh lum khubor la ïathuh ba u Gen Manoj Pande u la wanpoi ha ka jylla Manipur ha ka 28 tarik mynta u bnai, shi sngi hashwa ka jingwan jngoh jong u Myntri ka Tnat Korbar ri – Amit Shah.
