Shillong, Jymmang 29:
Ka Committee halor ka Roster System ka la rai ban pynïar ïa ka jylli jong ka ban ïakren lang noh halor ka reservation policy, bad ïa kane ka rai yn phah sha ka Sorkar Jylla ba kan mynjur.
Ïa kane la ïathuh da ka shongknor jong ka Committee halor ka Roster System, ka Kong Ampareen Lyngdoh hadien ba la wai ka jingïalang kaba nyngkong jong kane ka Committee ha Secretariat ha ka Lah Sngi U Blei.
Haba kren sha ki lad pathai khubor hadien ka jingïalang kaba la wan ïashim bynta lang da baroh ki seng saiñ pyrthei kiba donlang ha ka Committee, ka Kong Ampareen ka la ong na ka liang ka Committee ka la ïoh ban ïakren lang bad ki seng saiñ pyrthei kiba ïashim bynta ha kane ka jingïalang kynthup ïa ka Garo National Council kaba mihkhmat da u nongïalam jong ka lyngba ka Video Conference.
Ki nongïalam kiba mihkhmat ïa ka NPP, Congress, TMC, UDP, HSPDP, BJP, ki la ïashim bynta lang ha kane ka jingïalang jong ka Committee. Hynrei ka Khun Hynñiewtrep National Awakening Movement (KHNAM) ka khlem wan ïashim bynta.
Ka Kong Ampareen ka la ong ba ka Committee ka la sngewdei ba ka VPP ruh ka dei ban donlang, hynrei kam treh ban ïakren ïa ka roster system bad dei na kane ka daw ba ka Committee ka la shim lang ïa ka rai ban pynïar ïa ka jylli jong ka jingïakren halor ka reservation policy ha kaba yn khot ïa u President ka VPP ban donlang bad kum ka jingailad ba kan pyni ïa ki jingkdew jong ka kiba don ha ka reservation policy.
Kumta ka la ong ba na ka liang ka Committee kan phah ïa kane ka jingai jingmut sha ka Sorkar Jylla bad ka shong ha ka Sorkar ban mynjur.
Nangta, ka la ong ba ka shong ha ka Sorkar lada ka mynjur, la kan kynthup lang ïa ka mat reservation policy ha kajuh ka Committee kaba dei halor ka Roster ne kan don pat da kawei ka Committee halor ka Reservation Policy.
“Ka Committee ka sngew dei ba baroh ki seng saiñ pyrthei ki dei ban donbynta lang ban ïakren bad ka Committee kan kyrpad ban pynïar ïa ka jingïakren halor ka reservation policy namar kane ka Committee ka dei kaba la thaw tang halor ka Roster System. Ka reservation ka dei ka tynrai ne ka kmie, bad ka roster ka dei ka khun. Ngi la ïakren lang ba ngi dei ban ïakren lang baroh ar tylli bad ngin kyrpad ïa ka Sorkar ban pynrung ïa kata ka mat ha ka jingïakren namar kam lah ban long bad ong ba kawei ka seng kam treh ban donbynta lang,” la ong ka Kong Ampareen kaba dei ruh ka Myntri Sorkar ba peit ïa ka tnat aiñ.
Shuh shuh ka la ong ba baroh ka Committee ka sngew dei ruh ban kyrpad ïa u President ka VPP ban wan lang ban ïakren namar ka long kaba dei ba ka VPP kam nym donbynta ha ka jingïakren.
Shuh shuh ka Kong Ampareen ka la ïathuh ba ka Committee kan sa ïakynduh biang ha ka 31 tarik mynta u Jymmang ha Secretariat ha ka por 2 shiteng nohphai sngi.
