Jowai, Jymmang:
Ha kiwei-kiwei ki jaka haba pyntreikam ïa kano-kano ka skhim, ka ju don ka sngi buh maw nongrim bad ka sngi plie, hynrei ha Ri-lum Jaiñtia ka don kawei ka skhim kaba kyrpang haduh katta-katta namar ka don haduh 3 tylli ki sngi kyrpang.
Kine ki kynthup ïa ka sngi buh mawnongrim, ka sngi plie bad ka sngi pyntreikam ïa ka skhim.
Kane ka skhim kaba kyrpang ka dei ka Maternal Child Health Hospital kaba don ha Panaliar, Jowai ïa kaba la plie paidbah ha 3 tarik u Nohprah 2022.
Hynrei kam shym la treikam wat hadien 168 sngi ba la dep plie paidbah ïa ka namar ym pat dep thung ïa ki doktor bad ki nos.
Ha ka sngi Saitjaiñ, la pyntreikam noh ïa katei ka jaka ai jingsumar.
Haba ïakren bad u Medical Superintendent MCH Hospital, u Dr. E. War u la ïathuh ba katei ka aspatal ka don 50 jingthiah na bynta ki khynnah bad 50 jingthiah na bynta ki longkmie.
U la ïathuh ba katkum ka jingmang jong ka Sorkar, la dep thung 11 ngut ki doktor (Medical & Health Officers) bad 4 ngut ki doktor ba la pyntbit kyrpang – kata 2 ngut na bynta ki khyllung bad 2 ngut kiwei pat na bynta ki kynthei ne longkmie. U la ïathuh ruh ba la dep thung 33 ngut ki nos wat la kam pat biang satia.
Ha ka sngi ba la sdang pyntreikam ïa katei ka jaka sumar la pynrung 6 ngut ki nongpang bad ha katei ka sngi la don ruh iwei i longkmie i ba la kha ïa i khyllung shynrang.
Katkum ki tyllong khubor, la ïathuh ba la mang ban buh 27 ngut ki ‘Medical & Health Officer’ ha Maternal Child Health Hospital, Jowai ha ki bnai Kyllalyngkot ne Rymphang mynta u snem hynrei 10 ngut na ki, la hap phah noh sha ki PHC ne CHC namar ka jingleit pyntbit sha Chennai.
Na ki 17 ngut ki doktor kiba dang sah, la don sa 6 ngut kiba dang leit pule shuh-shuh bad kumta dang sah sa 11 ngut ki doktor ki ban trei mynta ha katei ka aspatal.
Shuh shuh kan dang shim por ïa ka OPD jong katei ka jaka sumar ba kan treikam pura.
