Paris, Jymmang:
Ka nongialehkai Tennis na ka ri Belarus ka Aryna Sabalenka ka la lah ban khur shalade ia ka jingjop ba nyng-kong na ka French Open hadien ka jinglah jong ka ban pynliem noh ia ka nongiakhun pyrshah kaba na Ukraine ka Marta Kostyuk; kaba lah kyntait ha ka ban iakhublei-kti bad katei ka nongialehkai na Belarus hadien ba lah wai noh ka jngiakhun ka jong ki.
Shuh shuh ha ka jingia aireng ka jong ki, ka Sabalenka ka lah sar ia ki 10 jong ki 12 jingialehkai ba khatduh na ka bynta ban khur shalade ia ki 6-3, 6-2 ha ka jingsdang ka jong ka ia ka jingiaid lynti ha ka lympung ha ka sien kaba nyngkongeh.
Na kata ka jingbym shym la treh da ka nongialehkai Ukraine ban iakhublei-kti hadien ba lah wai noh ka jingialehkai, na ka liang jong ka Sabalenka ka lah kubur ba ka lah ban pdiang ia kata lada ka Kostyuk ka don ia kata ka jingsngew jong ka jingisih bad jingshun ka jong ka pyrshah ia katei ka nongialehkai na Belarus.
Ha une u snem ba mynta jong ka lympung lah sakhi ia ka pateng ba thymmai ha katei ka lympung ialehkai ha kaba ha ka sien kaba nyngkong naduh u snem 2004, u Rafael Nadal un ym shimbynta ha katei ka lympung ialehkai kaba u ju sngewtynnad eh ban ialehkai namar ka jingshitom ka jong u bad uba lah hap ban shong noh sharud na ka lympung; kaba u lah mad ia ka jingshah rem noh tang ha ki lai jingiakhun jong ki 115 tylli ki jingialehkai.
Ha kawei pat ka jingiakhun jong ki shynrang, u rangialehkai na Greece u Stefanos Tsitsipas u lah jam mynta sha ka kylla iakhun kaba ar hadien ba u la lah ban khur shalade ia ki 7-5, 6-3, 4-6, 7-6 (9/7) jingjop pyrshah ia u Jiri Vesely. Kumjuh ruh u rangialehkai na Bilat u Dan Evans u lah mad pat ia ka jingshah pynrem ba nyngkong ha u nongioh wildcard ha ka lympung na ka ri Australia u Thanasi Kokkinakis da 6-4, 6-4, 6-4.
