Shillong, Jymmang:
Ka Wanri Pyngrope kaba dei ka puron jong ki phlim Khasi sa shisien pat ka la shah jied biang kum ka puron kaba biang tam ne Best Actor Female North East ha ka Prag Cine Award 2023 kaba pynlong da ka Prag News & Rengoni kaba dei ka news channel na Assam.
Ïa kane ka khusnam ka Wanri ka la leit shim ha ka 27 tarik mynta u bnai kaba la pynlong ha skulbah University of Science and Technology, Meghalaya, Killing, Ri-Bhoi District.
Ïa kane ka khusnam mynta u snem kane ka puron ka la shah jied na ka phlim ‘Ka Daw’ kaba dang shu pyni ha u ‘nai Nohprah 2022, katba ïa kiwei ki khusnam la ïoh rah da kiwei ki jylla kum na Assam bad Manipur.
Kum ban shu pynkynmaw kane ka puron ka la ïoh nyngkong ïa kane ka khusnam Best Actor Female ha u snem 2020 haba ka ak ha ka phlim 9Lad.
Haba ïakren bad u Kiki Garod uba dei u Director ka phlim ‘Ka Daw’ u la pynpaw ïa ka jingsngewkmen haba ka Wanri kaba la shah jied nyngkong ïa kane ka khusnam ha u snem 2020 ha ka phlim 9lad kaba u la ringdur hi ma u bad mynta u snem ka la shah jied biang sa ha ka phlim ‘Ka Daw’ Namar kata, u khmih lynti ruh ba ki phlim Khasi kiba dang thymmai kum ka ‘Johkhe.com’ kaba dang ap pali ha Bijou Cinema bad Borsing kaba dang ïaid ban ringdur kin sa ïoh biang kiwei ki khusnam.
