Shillong, Jymmang 29:
U rangapkol ka Hyderabad FC u Gurmeet Singh un ïasoh sha ka kynhun ïalehkai ka ri na ka bynta ban pynkhreh ïa ka Hero Intercontinental Cup ka ban long ha Bhubaneswar bad ka SAFF Championship ka ban long ha Bengaluru.
U coach ka kynhun u Igor Stimac u la khot ïa utei u rangapkol sha kane ka jingpynkhreh hadien ka jingmynsaw u rangapkol ka Mumbai City FC u Phurba Lachenpa bad u Suresh Singh Wangjam jong ka Bengaluru FC.
Kat kum ki khubor la ong ba u Phurba Lachenpa u la mynsaw na ki bynta jong ki kjat, katba u Suresh Singh Wangjam u la don hapdeng ka jingshah sumar na ka jingmynsaw (hamstring injury) bad u lah ban ym shah jied tat haduh ba un da long uba biang pura.
Ka long ka por ka bym poi pyrkhat ba kine ki rangïalehkai ba kynsai kin ngat ha ki jingmynsaw bad kin duh ïa ka lad ban mihkhmat ïa ka ri India ha kitei lympung bar ri, wat la ki la lah ban ïalehkai bha na ki klob ba ki mihkhmat.
Kumba ka paw ka Hyderabad FC ka la ïoh rung shaduh ka ‘playoff’ jong ka aïom ïalehkai 2022-23 ha ka lympung Indian Super League bad u Gurmeet Singh u la long uba paw lyngba ka jinglah ban ïalehkai bha. U la lah ban pyllait na ka jingshah thep haduh hynñiew sien na ka bynta ban pynlong ïa katei ka kynhun ban wan ha ka kyrdan ba-ar bad ban rung shaduh ka semi-final.
Ka jingshimpor u Laxmikant Kattimani ban koit na ka jingmynsaw ka la long ka kabu ksiar ïa u Gurmeet Singh ba un pyni ïa ka jingtbit ha ka Hyderabad FC bad u la lah ban ïalehkai.
Utei u rangapkol u la ïoh ban ïalehkai 24 sien ha ka Indian Super League, ha kaba u la ïoh ban kem haduh 63 sien bad pyllait na ka jingshah thep haduh khyndiat sien.
Kane ka jingïaid lynti ka jong u ka long kaba jngai bha naduh ba u la ïoh ban mihkhmat ha ka sien kaba nyngkong eh na ka bynta ka NorthEast United kata naduh ka aïom ïalehkai 2018-19 jong ka ISL.
Kane ka jingïoh ïa ka lad ha ka sien kaba nyngkong eh ban mihkhmat ïa ka ri kan pynlong ïa u Gurmeet Singh un ïalehkai bha ha kitei ki lympung. U Igor Stimac un ïoh ïa u rangapkol uba kynsai lada u Gurmeet un lah ban pynurlong ïa ka kynhun ban rung sha ka final ha ka Hero Intercontinental Cup bad kumjuh ha ka SAFF Championship.
Kane ka kynhun ïalehkai ka ri kan pynkhreh ïa ka jingïalehkai kaba nyngkong ha ka Hero Intercontinental Cup pyrshah ïa ka Mongolia ha ka 9 tarik u Jylliew.
