Shillong, Jymmang 29:
Ka Chelsea ha ka Lah Sngi U Blei ka la thung ïa u Mauricio Pochettino kum u manager bathymmai hadien ba une u coach barim ka Tottenham Hotspur bad Paris Saint Germain u la soi ïa ka kontrak kaba ar snem bad kaba lah ban pynjlan pat hadien.
Une u coach na Argentina u la khmih lynti ban pynkhie im biang ïa kane ka klob, kaba la wan ha ka kyrdan ba 12 ha ka aïom ïalehkai kaba khatduh. U Pochettino un wanphai biang sha ka Premier League hadien saw snem ba u la shah weng noh na ka Tottenham.
U Pochettino ba la 51 snem ka rta, un shimti ïa ka kam na u coach ba shipor u Frank Lampard naduh ka 1 tarik u Naitung.
“U Mauricio u dei u coach ba kynsai ka pyrthei bad uba la bat bun ki rekod. Ngi la khmih lynti ban ïoh ïa u,” la ong kat kum ka kyrwoh ba la pyllait da ki trai ka Chelsea u Todd Boehly bad u Behdad Eghbali.
U Pochettino, uba kham phaikhmat sha ki rangïalehkai kiba kynsai ha kaba u la lah ban pynurlong ïa ka Southampton ban wan ha ka kyrdan ba phra ha ka aïom ïalehkai kaba nyngkong ha England ha shwa ba un leit ïasoh sha ka Spurs ha u 2014.
Katei ka klob kaba na London ka la khur jingjop ha ka Champions League ha u 2021, hynrei ka la pynkut ïa kane ka aïom khlem da lah ban kynjoh sha ka thong naduh ba la lah ban pynurlong ha u aïom ïalehkai 1993-94 ha kaba ka la wan ha ka kyrdan ba 14 hapoh ka jingïalam u Glenn Hoddle.
U Pochettino u dei napdeng kiba lai ban shimti kum u manager ka Chelsea naduh ba la die ïa ka ha u 2022 sha ka kynhun ba la lamkhmat da ka LA Dodgers bad kaba long trai da u Todd Boehly.
Naduh ba la thung ïa u Lampard, ki trai kiba kynthup ïa u Boehly bad u Behdad Eghbali ki la ong ba utei u rangïalehkai shapdeng barim ka Chelsea la wanrah na ka bynta ban long kum u manager ba shipor tad haduh ban da lah ban wanrah ïa u manager bapura.
