Shillong, Jymmang 29:
Ki samla pule shynrang bad kynthei na ka thaiñ Ri-War Pynursla kiba pule ha ki shlem ai jinghikai bapher-bapher ha ka Lah Sngi U Blei ki la wan ban ai jingkyrshan ïa u President rangbah ka Voice of the People Party (VPP), Bah Ardent M. Basaïawmoit uba shong shah thngan hakhmat Additional Secretariat ban dawa khmih bniah ïa ka bhah thung kam ne ka ‘Reservation Policy’.
“Ngi wan hangne ban ai jingkyrshan ïa i Bah Ardent iba shah thngan na bynta ka pateng bad ka lawei jong ngi. Ngi ïohi ba kane ka jingshah thngan jong i ka ai mynsiem ïa ngi kum ki khynnah skul,” la ong uwei na ki samla pule na ka thaiñ Pynursla.
Haba kdew ba kum ki khun samla ki kwah ba u MLA ka Pynursla, Bah Prestone Tynsong un klet noh shuwa ïa ka uniphom bad ka seng jong u bad ban wan sha ka jaka shong shah thngan u Bah Ardent, utei u samla u la ong, “Ka uniphom jong ka jaidbynriew phim lah ban bujli, jong ka seng te phi lah ban bujli.”
Ha kajuh ka por, u la kyrpad ïa baroh ki nongmihkhmat Khasi-Jaiñtia ba kin wan sha kane ka jaka na bynta ka jingdawa jong ka jaidbynriew.
Haba pynsngew ba ki paidbah kiba wan sha katei ka jaka ki don shibun ki bynta, u la ong ba don kiba wan ai jingkyrshan (ïa u Bah Ardent) da ka jingduwai, don kiba wan ai khublei bad don ruh kiba wanrah da ki jingdro kum ka dak ka jingkyrshan bad jingai mynsiem ïa utei u nongïalam halor ka jinglong kloi jong u ban aiti na bynta ka lawei jong ki khun samla.
Haba ïai kyrpad ïa u Bah Prestone, utei u samla u la ong, “Ngi ïohi ba wat ki briew ba don jingduna ha ki dkhot met ki wan shane ban ai jingkyrshan ïa i Bah Ardent, ma phi khamtam uba long u nongmihkhmat uba ma ngi ki paidbah ngi la jied, ngi kyrpad rit ïa phi…wan ban ai jingkyrshan lang ïa ngi ka jaidbynriew Khasi.”
U la pynpaw ba kumba long mynta, ki samla ki don hapdeng ka umdum bad ka jingkhuslai ha ka jingmut-jingpyrkhat bad kumta u kyrpad ïa la u MLA ban wan sha katei ka jaka shah thngan u Bah Ardent.
Shuh shuh u la bynrap ba ka dei ka kamram jong u (Bah Prestone) kum u nongmihkhmat ban ïasaid na bynta ki paidbah ka thaiñ Pynursla.
“Kumba phi la kular ha ka por ilekshon ba phin peit ïa ka lawei bad jingmyntoi jong ki khun samla hynrei mynta shaei phi jah,” u la buh jingkylli.
Nalor kane, u la ong ba lada u Bah Ardent u ïalam shano-shano ruh, ki long kiba kloi ban kyrshan ïa u namar ki sngewthuh ba kane ka dei ka mat kaba donkam eh jong ki khun samla.
