Beijing, Jymmang:
Ha u Nohprah jong u snem ba la lah, ka China ka la weng bad kynran dien noh na ka thong ‘Zero Covid Policy’ ba ka la buh bad pyntreikam naduh kaba sdang jong ka khlam Covid kum shi bynta ban tehlakam ia ka jingpur bad jingsaphriang kulmar jong u khñiang jingpang Covid hapoh ka ri baroh kawei. Ka jingweng noh jong ka China ia kitei ki kyndon pyrkhing Covid ha katei ka por ka long hadien ka jingbitar jong ki paidbah haba iadei bad ka jingbuh kyndon jong ka sorkar, ha kaba ki la ïakhih bad pyrshah ia ka sorkar ba kam dei shuh ban dang buh ia kino kino ki kyndon namar ki la tip kumno ban im ryngkat bad ka khlam bad kumno ban iada bad ban ialeh pyrshah ruh ia ka.
Kumta, la ong ba ha kane ka por ruh watla ka khlam Covid ka la sdang ban jur biang hapoh China, katba ki bor pyniaid kim i-patiaw shuh ban dang wanrah ne pyntreikam biang da ki kyndon ban pyrkhing ia ki paidbah.
Ki bor pyniaid bad ki heh ka tnat ka koit ka khiah jong ka China, ki la pyntip ba ka jingdon kiba ioh pang Covid hapoh ka ri, ka la kiew bad sdang bun biang khamtam na u khñiang jingpang ba thymmai uba la sdang ban saphriang kylleng- sawdong.
U Zhong Nanshan, uba long u doktor uba la shemphang bha, u long uwei na kito kiba la iathuh lypa ha u snem 2020 ba ka khlam Covid ka long kaba kloi bha ban pur bad iabit na uwei u briew sha uwei pat bad ha kane ka por ruh, ha kane ka kynti pat u la iathuh ba ka khlam Covid kan sa jur biang ha China bad kin sa don palat 65 million ngut ha ka shi taiew ki ban shah ktah ha utei u khñiang jingpang Coronavirus ynda la poi u Jylliew.
Watla ha ki khyndiat por ba la leit jong une hi u Jymmang, utei u doktor u la iathuh ba kin don kumba 40 million ngut ki ban ioh pang ha ka shi taiew ha ki taiew kut bnai jong u Jymmang. hynrei ha kane ka por, utei u doktor u la pynkiew shuh shuh ia ka jingbuh jingkheiñ antad jong u halor ka jingdon ki briew ki ban sa ioh kem ia utei u khñiang jingpang ha une u Jylliew bad ha ki bnai ki ban wan.
La ong ruh ba naduh ba ka China ka la weng bad pynsangeh treikam noh ia ka ‘Zero Covid’ ha u Nohprah, ki la iathuh ba ka jingdon kiba ioh kem pang shisha ia u khñiang jingpang Covid-19 hapoh ka ri, ka la poi kumba 37 million ngut ha ka shi sngi.
Hynrei ka sorkar kam shym bud dien shuh ia kane namar ba ki paidbah ruh ki la thait ban shu shah teh- shah khum ha ki kynjri jingpyrkhing jong ki kyndon ‘Protocols’ ka khlam Covid bad kumta ki bor pyniaid ruh kim lah shuh ban leh eiei naba wat ki paidbah ki la kwah ban iaid laitluid ha la ka mon.
