Shillong, Jymmang 30:
Kum shi bynta ban ai ka jingkyrshan bad ai mynsiem ïa ka jingshong shah thngan jong u Bah Ardent M Basaïawmoit, ki paidbah ka thaiñ Riwar Mihngi kin pynlong da ka ‘Peace Rally’ ha jaka pynïeng kali ha Pynursla.
Ïa kane ka ‘Peace Rally’ yn pynlong ha ka 1 tarik Jylliew, 2023 ha ka por 11 baje mynstep ban ai ka jingkyrshan ïa ka jingshah thngan ba khlem buh por jong u Bah Ardent halor ka jingdawa ban khmih biang ïa ka bhah thung kam da ka Sorkar ba la ïalam da u Conrad K Sangma.
Kumta la ïawer ïa baroh ki sordar, ki rangbah shnong, ki paidbah bad kumjuh ruh ki khynnah skul jong baroh ka thaiñ ba kin ïawan ryntih lang ha katei ka sngi. La kyrpad ruh ïa baroh kiba wan sha katei ka jingïalang ba kin pynkhreh la ki jong ki placard ha katei ka sngi.
