Shillong, Jymmang:
Ki shipai BSF jong ka 172 Bn BSF Meghalaya ha ka Sngi U Blei ki la ïoh ban pyllait ïa 20 tylli ki masi na ki jaka khappud ka East Jaiñtia Hills katba dang thmu shalan tuh sha Bangladesh.
Ki shipai BSF ka ‘Mobile Check Post’, Rattachera kiba la i-shan khmat ïa ka ïaid ka ïeng jong kawei ka trok, ki la phah sangeh ïa katei ka kali kaba wan na Kalain (Assam) sha Umkiang.
U nongñiah jong katei ka trok ha ka jaka ban sangeh, u la pynher sted pynban na katei ka ‘Check Post’. Na ka liang ki BSF ki la beh ïa katei ka trok na bynta 10 km bad ïoh bat ïa ka najan kawei ka jaka theh umphniang, Umkiang. Ha ka jingtalasi ïa katei ka trok, la lap ïa 20 tylli ki masi kiba la thmu shalan tuh sha Bangladesh watla u nongñiah jong katei ka kali u la ïoh ban phet krad noh na katei ka jaka da kaba shim kabu ïa ka jingdum jong ka miet.
Ha kawei pat ka jiingjia, ki shipai ka 04 Bn BSF ki la kurup 17 tylli ki masi na ka thaiñ Rongtilla katba dang thmu shalan tuh sha Bangladesh. Ïa kitei ki masi ba la ïoh kurup, la aiti noh sha ki pulit ban leh ïa kaba donkam. Na ka liang u PRO ka tnad BSF Meghalaya u la ong ba hapoh ka jingkhmih jong u, ki shipai ka Meghalaya Frontier ki la kurup 1669 tylli ki masi naduh u Kyllalyngkot 2023 ha ki jaka khappud.
Ka jingdawa masi ha Bangladesh ka ju kiew bha hashuwa jong ka tamasa ‘Bakrid’, bad haba ïadei bad kane, ka BSF ka la pynkhlaiñ ïa ka jingpeitngor jong ka ha ki jaka khappud ban pyllait ïa ka thaiñ na ki kam be-aiñ bad jingkhaïi tuh.
