Shillong, Jymmang 30:
Ka synjuk ki Waheh Shnong ka Ri Jaiñtia, ka la dawa ïa ka Sorkar Jylla ban ai bhah ïa ki Pnar/Jaiñtia ym duna ïa ka 20% ha ka bhah thung kam thung jam hapoh ka Jylla.
Ka synjuk lyngba u President Bah A Lipon bad Secretary T. Phawa, ka la phah da ka dorkhas ha ka Sngi Ba-ar sha ka Chairperson ka Committee ki seng saiñ pyrthei ban ïatai halor ka Reservation Roster bad Reservation Policy, ka Kong Ampareen, ban bishar thymmai ïa ka Reservation Policy 1972 haba mynjur ban buh ïa ka bhah ïa ki Jaiñtia ym duna ïa ka 20%.
Ïa kane ka dorkhas, ka synjuk ka la phah ruh sha baroh 7 ngut ki MLA na ri-lum Jaiñtia ba kynthup ïa u Symbud Myntri Rangbah ka Jylla Bah Sniawbhalang Dhar.
Nalor kane, ka synjuk ka la pyntip ruh ba ka la shim rai ban dawa jur ïa ka Sorkar Jylla ba kam dei ban pyntreikam ïa ka Reservation Roster naduh u snem ba sdang treikam ka Reservation Policy. Ka ong ba ka Roster System ka dei ban treikam naduh u snem 2023 shakhmat.
