Tura, Jymmang 30:
Hadien ka jingtyrwa ban khmih bniah ïa ka bhah thung kam ne ka ‘Reservation Policy’, ka Anti Corruption League (ACL) kaba ha ki jaka thor ka Ri-lum Garo ha ka Sngi Ba-ar ka la phah shithi sha u Myntri Rangbah ka Jylla, u Conrad Sangma ban kyrpad na u ban kynthup lang ïa ki nongmihkhmat na ki jaidbynriew rit paid ha ka jingïakren na bynta ban khmih bniah ïa ka bhah thung kam.
Ka seng ha kajuh ka por ka la dawa 4% ka bhah na bynta ka jaidbynriew jong ki.
“Haba la thaw ïa ka Meghalaya ha u snem 1972, ka jingdon jong ki bym dei trai-ri hapoh ka Jylla ka long kumba 20%. Ym lah len ba ki bym dei trai-ri khamtam ki ‘Desi Muslim’ kiba na ki jaka thor ka Ri-lum Garo ki la shim bynta shit rhem ha ka jingïakhih ‘Hill State’ hapoh ka jingïalam u Captain Williamson Sangma lem bad kiwei-kiwei ki nongïalam trai-ri. Watla la ïadon bynta bad ka Assam lem bad ka kolshor jong ka na bynta ki spah snem, ki ‘Desi Muslim’ na Ri-lum Garo ki la kner ka jingkyrshan na bynta ka jingïoh ïa ka Jylla lajong ha ryngkat ki jingkyrmen ba ha ka Jylla bathymmai, ki hok bad ki jingangnud ha ka liang ka imlang-sahlang bad ka ïoh ka kot kin ïoh jingïada bad shah kynthup lang. Ha ka jingïalang hapdeng ki nongmihkhmat na ka liang ka Sorkar Pdeng, ka kynhun ki bym dei trai-ri hapoh ka jingïalam u MDC ha kito ki por, u (L) Akramuz Zaman bad ka kynhun trai-ri hapoh ka jingïalam u Captain W.A. Sangma, la kular sha kito ki bym dei trai-ri ïa ki lad ki lynti ba mar katjuh na ki nongïalam trai-ri. La kular ruh ba ïa ki hok bad jingangnud jong ngi, ka jingkiew bad ka roi ka par jong ngi kin ïoh ïa ka jingbiang tara kumba long lem ki trai-ri jong ka Meghalaya,” la ong ka kyrwoh na ka ACL da kaba bynrap ba ki jingkular kiba la khlei kim shym la urlong.
“Ka nongrim hi jong ka jingbhah ka dei ka jingleh kaba manbha na ka liang ka Jylla haba ïadei bad ka kynhun jong kito ki bym don ki lad ki lynti ne mad jingeh ha ki por ba la leit. Ngi ngeit skhem ba ka jingbhah ka long ka jingïabiang kaba paka tam ha ka imlang-sahlang. Ngi kyrshan tyngeh ïa ki hok ïoh bhah jong ki hynmen ki para Garo, Khasi, Jaiñtia lem bad kiwei-kiwei ki ’riewlum jong ka Meghalaya. Kane ka bhah thung kam ba mynta ym tang ba ka pynduh ïa kiba dei hok, hynrei ka la wanrah ruh sa kawei pat ka kynhun kaba mad ïa ka jingbym hok bad ka jingbym biang ha ka jingdon bad jingïoh rung sha ki shlem ai jinghikai, kam Sorkar lem bad kiwei-kiwei. Ha kawei ka liang, ka ‘Reservation Policy’ ka Meghalaya khnang ban ïada ïa kiba shah knieh noh hapdeng ki trai-ri ka la wanrah pynban ïa kawei pat ka kynhun kaba mad ne ïakynduh jingeh – ki bym dei trai-ri bad ñiat sharud ïa ki da kaba kyntait ïa ka hok na bynta ki jingïoh jingmyntoi bad ka jingïoh rung sha ki shlem ai jinghikai bad ka lad kamai,” la bynrap shuh shuh ka kyrwoh bad kyntu ïa ka Sorkar hapoh ka jingïalam u Conrad Sangma ban pynbeit ïa katei kam.
