Aizawl, Jymmang:
Ki bor sorkar jong ka jylla Mizoram ha ki khyndiat sngi kiba la liet noh ki la pyntip ba ka sorkar jylla ka la pynmih da ka hukum ban khang pyrshah ïa ka jingwan pynpoi ha Mizoram na kiwei kiwei pat ki jylla ïa ki dohkha, hadien ka jinglap ba ki don bun tylli ki dohkha kiba don ïa ka jingsma umphniang sharak.
Kat kum ka jingpyllait kyrwoh jong ka sorkar la ïathuh ba hadien katei ka jingjia, na ka liang ki nongtrei ka Food and Drugs Administration (FDA) jong ka tnat Koit Khiah ka jylla ki la leit ban pynlong ïa ki jingtohkit ha ki iew bapher bapher kiba don ha kylleng ki bynta jong ka jylla.
La ïathuh ruh ba na ka liang ki nongtrei ka FDA ha ka jingleit khynra jong ki, ki lum ïa ki katto katne ki dohkha Rahu bad ïa ki nongmuna (sample) la phah sha Central Food Laboratory, Kolkata ban pyndep ïa ki ‘test’.
Halor katei ka jingjia, na ka liang ka FDA ka la bthah ïa ki nongkhaïi dohkha ba kim dei ban wan pynpoi ïa ki dohkha Rahu ha Mizoram tad haduh ban da ïoh ïa ka ‘result’ na ki ‘test’. Ka la bthah ruh ïa ki nongshong shnong ka jylla ba kim kiar na kaba bam ïa kitei ki jait dohkha bad kmjuh ruh ba ki nongdie dohkha kin sangeh shwa shipor ban die ïa kitei ki jait dohkha.
Na ka liang ka tnat FDA ka la pyntip shuh shuh ba la shim ïa ki sienjam ban ïakren bad ki bor sorkar ka tnat Food Safety kiba na kiwei pat ki jylla, kiba dei ki jylla ba la wan pynpoi ïa ki dohkha Rahu sha Mizoram.
Halor katei ka jingjia, na ka liang ka FDA ka la pyntip ba ka la sdang ban pynlong da ka jingtohkit kaba bniah ban lah ïa ka daw bah ba balei kitei ki dohkha ki don ïa ka jingsma umphniang sharak.
