Jowai, Jymmang:
Ka jingdawa ïa ka hok ban bhah kam bhah jam hapoh Jylla katkum ka jingkylla ka por bad ka jingbun paid hapdeng u Garo, Khasi bad Jaiñtia kam mut ba pyrshah sorkar ne pynïapher jaidbynriew, la ong u Working President JSM u Jimmy Raul Kharmuti.
U la ong ka jingïakhih ki nongshong shnong jong ka Ri Jaiñtia hapoh ka shatri Jaiñtia Coordination Committee for Reservation Policy, 1972 (JCCRP) ka dei halor ka nongrim ban dawa ïa ka hok longbriew manbriew ha ka rukom bhah kam bhah jam hapoh Jylla, khlem kano kano ka jingthmu ban pyrshah ïa ka Sorkar Jylla ne ban pynïapher jaidbynriew hapdeng u Khasi, Jaintia bad u Garo hapoh ka jylla Meghalaya.
Kane ka jingdawa ban review ne pynthymmai ïa ka Reservation Policy 1972, ka dei ban bhah ïa ka jingïoh kam hapoh ki kam Sorkar katkum ka jingkylla ka por bad ka jingbun paid hapdeng ki nongshong shnong jong ki briew ha Meghalaya.
U la ong ruh lada peit ki jaidbynriew Khasi bad Jaiñtia kiba don ka jingbun paid da 14 lak tam, katba ki Garo ki don tang kumba 8 lak tam ha kaba ka jaidbynriew Khasi, Jaiñtia ka la tam ha ka jingbun paid kumba 6 lak tam. Dei halor kane ka nongrim ka Sorkar jylla ka la dei ban pynthymmai noh ïa ka Reservation Policy 1972 kaba la rim bad noh shiliang haduh katta katta kaba lah ban wanrah ïa ka jingeh kaba khraw ïa ka Jylla baroh kawei ha ka liang ka shongsuk shongsaiñ bad ka roi ka par.
U Jimmy u la ong ruh ba ka jingkren jong uwei na ki nongïalam na Garo ba um dei ban ktah bad ka ding halor ban pynthymmai ïa ka Reservation Policy, 1972 ban lait na ka jingumsnam hapdeng u Garo bad u Khasi, Jaiñtia dei kaba bakla bad ka bym don nongrim. Pynban na ka liang une u nongïalam u la ong ban dawa ïa ka hok ba long solansor ha ka rukom bhah kam bhah jam lyngba ka Reservation Policy katkum ka jingbun paid kan wanrah bad pynneh pynsah ïa ka jingburom kylliang para jaidbynriew hapoh ka jylla, khnang ba ki pateng ba hadien habud kin suk kin sain.
Ha ka juh ka por u la pynrem ruh ïa ka jingkren u Myntri ka tnat Pule Puthi ka jylla ba ka jingdawa ban review ïa ka Reservation Policy ka lah ban wanrah ïa ka jingtuklar ka ïingbishar lada jia wa tam ka bhah palat 50%, ha kaba une u nongïalam u la ong ba ka Judicial/Court ba don burom ka long kaba stad bad ka ailad ruh ïa ka Legislative (Sorkar Jylla) ban peit bad pynbiang ïa ka jingbhah kam bhah jam katkum ka jinglong jingman ka jaka bad ki briew ba shong basah ha ka jylla khnang ban lah ban wanrah ïa ka bha ka miat bad ka shongsuk ka shong saiñ hapoh ka jylla khlem ka jingleh shiliang bad noh shiliang ha synshar khadar.
Ha ka juh ka por u Jimmy Raul Kharmuti u la ong ba u don jingkyrmen ha ka Sorkar jylla wat lada ka shim por hynrei u ngeit skhem ba ki dang bishar bniah halor ka Reservation Policy bad kin leh ïa kaba dei eh ha ka por kaba biang, kumba ka kmie bad u kpa ki juh pyrkhat na ka bynta ka bha ka miat ki khun ki kti bad kim ju aili ba ka jingieid lane ka bhah bynta jong ki khun ki kti kam dei ban noh shiliang, kumjuh ruh ka Sorkar ruh kaba long kum ka Kmie u kpa kin sa bishar bad pyntikna ba ki khun ki kti jong ka kiba long ki nongshong Shnong jong ka jylla kidei ban ioh ka bhah ka bynta katkum ka hok jong ki khlem da noh shiliang shano shano ruh na ka bynta ka suk ka saiñ bad ka roi ka par hapoh ka jylla Meghalaya baroh kawei.
