Shillong, Jymmang:
Ka Hill State People’s Democratic Party (HSPDP) ka la rai ban rah ïa ka mat ïakren hapoh ka Meghalaya Democratic Party (MDA) halor ka jingpynbeit ïa ka Reservation Policy.
Ïa kane ka rai la shim ha ka jingïalang jong ka CEC kaba la long ha ka Lah Sngi U Blei ha Shillong Club.
Haba kren sha ki lad pathai khubor, u President ka HSPDP u Bah KP Pangniang u la ong ba kum ki para nongkitkam jong ka seng la ïaphylliew jingmut lang ha ka CEC haba ïadei bad ka Reservation Policy; kaba dei ruh ka mat kaba don ha ka kular ilekshon jong ka seng ha kaba la dep ong ban pyrshang ban pynbeit ïa kane ka policy kaba la slem.
“Ka HSPDP kum ka seng kaba la dei lypa kaba don hapoh ka MDA-2, ngin rah ïa kane ka mat bad ngin ïatei shuh shuh halor kane, la ka dei ha ka Coordination Committee jong ka MDA ne kano kano ka kynhun. Ngi la don lypa u Myntri ha ka Sorkar MDA-2, ha kaba ma u lem bad u MLA kin pynsngew bad rah ïa kane hapoh MDA.
U la ong ruh ba ka HSPDP kan sa donlang ruh ha ka jingïalang jong baroh ki seng saiñ pyrthei lada ka don ka jingïakren halor kane.
Na ka liang u MLA ka Mawthadraishan uba dei ruh u Myntri Sorkar u Bah Shakliar Warjri bad u MLA ka Mawshynrut u Bah Methodius Dkhar ki la ong ba kin sa rah ïa kane ka mat sha ka Sorkar ban ïakren lang ha ka MDA ne kano kano ka kynhun jong ka Sorkar.
U MDC ka HSPDP u Bah Martle N Mukhim u la ong ban ïakren ïa kane ka mat kaba dei ka kam bah, ka dei ka kamram ka Sorkar ban buh ruh ïa ka Committee ki ‘riewshemphang.
U la ong ba ka kynrum kynram ka mih namar ka Reservation Policy la sngewthuh ka don ka jingduna ha ka.
