Paris, Jymmang:
Uwei na ki nongialehkai na ka ri China u Zhang Zhizhen, u lah kylla long mynta u nongialehkai ba nyngkongtam eh jong katei ka ri hadien ki 86 snem ban khur ia ka jingjop ba nyngkong na ka lympung ialehkai kaba dang iaid mynta shakhmat ka French Open.
Kumta ruh utei u rangialehkai uba bat ia ka kyrdan ba 71 ha ka pyrthei, ha ka jingshimbynta ka jong u ha ktei ka lympung ba mynta, u la lah ban tam jingjop shakhmat pyrshah ia u Dusan Lajovic da kaba khur noh shalade ia ki 6-1, 4-1; kata ha ka por ba utei urangiakhun pyrshah jong u Zhang na Serbia u lah shongthait noh namar ka jingshitom ka jong u. ka long ruh ka jingjop ba nyngkong ha ka main draw na ka bynta u Zhang ban khur ia ka, ha kaba u lah sdang ia ka jingiaid lynti ha ka lympung pyrshah ia utei u nongialehkai bym pat da tbit than hadien ki lai sien mih madan ialehkai ha ki jingiakhun Grand Slam ba lah dep.
Shuh shuh ruh ha u snem 2021, u Zhang u long uba nyngkongeh napdeng ki nongialehkai na China ban ioh ialehkai ha ka Wimbledon katba kham ha shuwa jong u snem ba mynta kata ha une u bnai ba mynta u lah ioh ban shimbynta ha ka Madrid Open bad u long ruh uba nyngkongeh ban ioh rung sha ka quarter-final ha kum katei ka lympung ialehkai kaba paw. Ka khubor ka iathuh ruh ba hadien katei ka jingjop, u Zhang un iakynduh sa bad u Thiago Agustin Tirante; uba la lah ban pynliem noh ia u Botic van de Zandschulp.
