Shillong, Jymmang 30:
Ka AITC ka la ong ba ka rai jong ka Sorkar ban pynjlan ïa ka jingïakren sha ka ‘Reservation Policy’ ka long ka sienjam kaba biang tam.
“Ka long ka khubor kaba bha ba ka Sorkar ka la mynjur ban ïakren halor ka ‘Reservation Policy’. Kane ka jingïakren ka long kaba donkam namar ka la don mynta la palat 50 snem bad kumta ka donkam ïa ka jingkhmih bniah bad ïa kane, dei ban leh ha kata ka rukom ha kaba baroh kin ïoh jingmyntoi,” la ong u heh nongïalam ka AITC, Bah Charles Pyngrope ha ka Sngi Ba-ar.
U la ong, “Ka jingïakren ka long kaba donkam. Ha ka jingshisha nga la mut kyrpad ïa ka Sorkar ban don ka jingïakren bad pynkut noh ïa kane ka kam khnang ba ngi lah ban jam shakhmat.”
“Haba ïadei bad ka ‘Roster System’, nga sngew ba ka jingpyntreikam ka dei ban long nangne shakhmat khnang ba kaei ka ban urlong nangne shakhmat kan dei ban long ha ka rukom kaba dei na bynta ka jingmyntoi jong baroh lang,” u la ong.
U la bynrap, “Nga sngewkmen ba ka Sorkar ka la pdiang ïa ka jingdawa jong ki nongshong shnong ban ïakren halor ka ‘Reservation Policy’.”
