Nongstoiñ, Jymmang 30:
Ki paidbah nongshong shnong jong ka West Khasi Hills khamtam na sor Nongstoiñ ha ka 30 tarik mynta u bnai ki la ïa mih paidbah ban ïashim bynta shit rhem ha ka ‘Peace Rally’ kaba la pynlong da ki paidbah jong ka Bri u Hynñiewtrep West Khasi Hills District.
Ka jingthmu jong katei ka jingïaid paidbah ka long ban pynpaw ïa ka jingkyrshan ïa u Bah Ardent M Basaïawmoit uba la shim ïa ka sien jam ban shong shah thngan khlem buh por na ka bynta ban dawa pynbeit ïa ka bhah thung kam thung jam.
Ha kajuh ka por katei ka jingïaid paidbah ka la dawa ruh ïa ka Sorkar Jylla ha kaba ïadei ban pynthymmai noh ïa ka bhah thung kam thung jam lane ka reservation policy.
Ïa katei ka jingïaid paidbah la sdang na lad jong ka surok ka ban leit sha Rambrai najan ka State Bank bad pynkut hakhmat ïew Nongstoiñ da ka jingïalang.
Shuh shuh nalor ki samla, ki ’riew rangbah, da ka jingsngewkhia, ki longkmie ruh ha ryngkat ki khun ki kti ki la ïa mih lang ban ïashim bynta.
La ïohi ruh ba ka phang pdeng jong katei ka jingïaid paidbah ka long “Ko ki MLA Khasi to ïatyllilang baroh ban im ki pateng jong ka jaidbynriew Hynñiewtrep jong ngi.”
“Baroh ki khun ka bri u Hynñiewtrep sangeh noh ban pyni ïa ki banner ban pyni ïa kino kino ki kynhun hynrei ngin ïa ïeng tang kawei,” la ong u samla Shem Rynniaw haba kren ha ka jingïalang.
U la ong ruh ba kum u samla u la dep ban pule bad sngewthuh ïa ki kyndon jong ka reservation policy tang hapoh shi sngi bad u la ong ruh ba lada ma u kum u nongkyndong u la lah ban sngewthuh da kaba pule tang shi sngi kan eh aïu ïa ki nongmihkhmat ban sngewthuh bad balei ki hap ban da pan por ban phah ap bad ïai shah ïa ki paidbah ki bym lah shuh ban ap bad ïai shah.
U samla Hamar Lyngkhoi u la ong, “Ngi donkam ïa phi ki nongmihkhmat ban mih ban ai ka jingkyrshan hakhmat jong u paidbah ban ong ïa ngin ïatreilang na ka bynta kane ka mat ka daw bah jong ka jaidbynriew ban ai ka jingkyrshan ïa u Bah Ardent, ngim idonkam tang ha ki rynsan social media.”
Katba na ka liang u samla Willstone Sohshang pat u la ther tyngeh ïa ki nongmihkhmat da kaba ong, wat nym aplai shuh ïa ka post MDC, MLA lada phi dang donkam ïa ki IAS ophisar, bad kiwei kiwei ban kylli ïa ki la ka long ne em kane ka aiñ ban pyntreikam.
U la ong ruh, “Ko MLA Khasi buh ïa ka jaidbynriew shakhmat bad ka shuki kan bud hi nadien, bad ngim kwah ban ïa umsnam ne kwah ban pynmih kino kino ki kynrum kynram bad lada ka sorkar kam lah ban leh eiei ban shim ïa ki lad ki lynti ban pynbeit ïa ka reservation policy, ka banse kan thom ïa ka sang.”
U la ong ba ka jingthaw komiti ka sorkar ka dei tang ka buit pynjlan por (delay tactics) bad ka jingpynlut kai ïa ka por bad ka pisa paidbah namar ka jaka ban ïatai bad thaw aiñ ka dei ka ïingdorbar thawaiñ ka Jylla bad ïa ki aiñ baroh khoit dei ban thaw hapoh ka ïingdorbar ym shane shatai.
U samla Lumlang Kharayiemlieh u la kam ba ki don kiba ong ba ym lah ban pynbeit ïa ka reservation policy kumne kumne hynrei lada ïa u pud u sam bad ka Assam kaba na shabar ïing lah ban pynkylla balei ym lah ban pynbeit ïa ka reservation policy kaba dei ka kam ïing hapdeng u Khasi bad Garo.
Ha katei ka sngi nalor ka jingïaid paidbah, la ïohi ruh ïa ka jingïashim bynta shitrhem jong ki paidbah ban ïa soi kum ka dak ban pynpaw ïa ka jingkyrshan ban ïakhun ïa katei ka mat.
