Tura, Jymmang 30:
Ka Meghalaya Indigenous Minority Tribes’ Forum (MIMTF) ha ka Sngi Ba-ar ka la pynpaw ïa ka jingbynñiaw ba ym shym la don nongmihkhmat na ki jaidbynriew rit paid ba shong ba sah hapoh ka Jylla ba shah kynthup ha ka kynhun ba la thaw ban ïakren halor ka jingkhmih bniah ïa ka bhah thung kam ne ka ‘Reservation Policy’.
Ka MIMTF ka dei ka seng kaba la thaw thymmai ba kynthup ïa ki nongmihkhmat na ki jaidbynriew Rabha, Boro, Hajong, Koch bad Mann, kaba la thaw ha ka 29 tarik mynta u bnai ban kren halor ka mat bad kyrpad ïa ka jingkynthup jong ki dkhot na kitei ki jaidbynriew ha ka jingïakren.
Ïa ka jingïalang ban thaw ïa ka MIMTF la pynlong ha Garobadha, West Garo Hills.
Ha kawei pat ka liang, u MDC ka GHADC na Barengapara, u Pramod Koch u la pynpaw ka jingbym sngewtynnad halor kaei kaba la jia.
“La sngewthuh ba la dep thaw ïa ka kynhun ka ban sngap ïa ki jingai jingmut na ki kynhun bapher-bapher, seng saiñ pyrthei, ki nongshong shnong ba don ka jingkitkhlieh bad kiwei-kiwei haba ïadei bad ka jingkhmih bniah ïa ka bhah thung kam ne ka ‘Reservation Policy’. Hynrei kaba sngewlyngngoh ka long ba ym shym la don ka jingkhot ïa ki jaidbynriew rit paid ba shong ba sah hapoh ka Jylla kum ki Koch, Hajong, Rabha, Bodo bad Mann. Nga kyrpad ïa u Myntri Rangbah, u Conrad Sangma ban khot sngewbha khnang ba ngi ruh ngi lah ban pynpaw ïa ki jingsngew,” la ong u MDC.
