New Delhi, Jymmang:
Ka khubor ba lah ioh lum ka iathuh ba na ka liang jong u khlur kawang Sum ka ri uba long ruh u lahduh ha ka Tokyo Olympic 2021 u Neeraj Chopra u lah pynbna paidbah ia ka jingweng noh ban shimbynta ha ka lympung ialehkai ka ban sa long ha u bnai ban wan ka FBK Games, namar ka jingshitom ha kaba iadei bad ki dohksah. Katei ka jingkynran-dien ka long ruh kum shibynta jong ki lad jingiada ialade khnang ban ym don kano kano ka jingshitom hapdeng jong ka jingshimbynta ka jong u ha ka lympung.
Ka khubor ka iathuh ba ka jingshitom kaba utei urangialehkai u lah ioh ka long ha ka por ba u dang shimbynta ha ka prokram hikai bad kilan-met. Kumta hadien ka jingphah peitbniah, ma u lem bad ka kynhun baroh kawei ka lah shim ia katei ka rai.
Shuh shuh ka khubor ka iathuh ba katei ka lympung ialehkai ka ban sa long kan long ha Hengelo ha kaba bun na ki nongialehkai na kylleng ka pyrthei kin sa leit ban shimbynta naba ka long ruh ka shibynta jong ka World Athletics Continental Tour Gold Level event ka ban sdang naduh ka 4 tarik u Jylliew 2023.
Kum ban shu pynkynmaw hangne ka long ba u Chopra u lah iai shadkmen ha ka jinglah jong u ban ialehkai bha naduh kaba sdang ka jingiaid lynti jong u ha ka aiom ialehkai ba mynta da kaba khur ruh shalade ia ka nam jop ha ka Doha Diamond League ha ka 5 tarik u Jymmang; ha ka jinglah ban kawang ia u Sum ha ka jingjngai kaba 88.67m. Kumta hadien ka jingkynran-dien noh ka jong u na katei ka lympung ialehkai kaba mynta, u Chopra u khmih lynti ba un sa ioh ban wanphai pat sha ka kam ialehkai ha ka lympung ban sa long pat ha Turku; Finland ka Paavo Nurmi Games ha ka 13 tarik u Jylliew.
