Shillong, Jymmang 30:
Ka Khasi Jaiñtia Christian Leaders’ Forum (KJCLF) ka kyrpad ïa ka Sorkar Jylla ban pynbeit noh kloi ïa ka mat halor ka ‘Reservation Policy’.
Haba kdew ba hadien 50 snem, la lap ba katei ka bhah thung kam ka donkam ïa ka jingkhmih bniah, u Secretary ka KJCLF, Rev. Dr. Edwin H. Kharkongor ha ka kyrwoh khubor u la ong, “Na bynta ka bit ka biang ki khun samla jong ngi bad ka lawei ka ban wan, ka long kaba shong hok ban pynbeit ïa ki jingbakla ki bym shym la ïohi ne patiaw da ka jingbym salia bad ka jingkhwan myntoi jong kiba bun ha ki por ba la leit kumjuh kito kiba don mynta ha ka bor.”
Kumta ka kynhun ka kyrpad ïa ka Sorkar bad ki bor ba dei khmih ban pynbeit noh kloi ïa kane ka kam.
Ha kawei ka liang u la ong ba ka KJCLF ha ryngkat katto-katne ngut ki nongïalam niam ka nongbah dang shen ka la pynlong ïa ka jingïakynduh halor ka jinglong-jingman ka niam Khristan, ka Balang, ki shlem treikam bad ka jingshem jong ki ’riewngeit Khristan ha ka ri mynta.
“Nga sngew ba ki nongïalam Khristan ki dei ban don ka jingsngewthuh haba ïadei bad ka aiñ ha kajuh ka por ban syllok ïa ki dkhot halor ki mat kiba ktah ïa ka jingngeit jong ki, kumjuh halor ki mat kiba ktah ïa ka imlang-sahlang baroh kawei. Ngi kyntu ïa ki nongïalam niam ban pynlong ïa ki prokram ai jinghikai halor kitei ki mat na ka por sha ka por,” u la ong.
Shuh shuh ka KJCLF ka khot ka wer ïa baroh ki Khristan hapoh ka thaiñ ban ïasnoh kti lang ha ka jingduwai khnang ba ka jingsuk kan wan ha Manipur bad ban long kiba kloi ban kner ka jingïarap bad jingkyrshan ba mardor sha ki lanot jong ka jingïakynad ha ka Jylla ba marjan.
