Shillong, Jymmang:
U MLA bad MDC ka Congress na Nongstoiñ, Bah Gabriel Wahlang, haba pynpaw ïa la ka jong ka jingsngewkhia, u la ong ba la donkam ban peit bad bishar bniah halor ka Reservation Policy ba kan long kumno ban ïalam na ka bynta ka jaidbynriew jong ka jylla.
Haba kren sha ki lad pathai khubor, u Bah Gabriel u la ong ba kane ka jingpynpaw ka jong u, ka dei beit thik kum u ‘riew shimet bad nongmihkhmat ba la jied da u paidbah ym kum u Congress. “Nga kren hangne ym tang na ka bynta ka Nongstoiñ, hynrei na ka bynta ka jylla hi baroh kawei ba la donkam ban peit bad bishar bniah ïa ka Reservation Policy,” la ong u Bah Gabriel.
“Dang shen ngi la don ka workshop ha Mohali, Punjab, ha kaba ngi la don 27 ngut ki MLA bad nga ïohi ba ngi don la ka jong ka jong ka jingsngewkhia halor kane ka kam bad kam dei pat ba ong ba kim kwah ban kren, hynrei ki don ka jong ka jong ka jingsngew halor kane ka policy,” la ong une u MLA ka Nongstoiñ.
“Ai ba ki paidbah kin bishar hi, ai kiba kynthoh kin kynthoh bad ai kiba ïaroh kin ïaroh, naba ïa ka kam ba ïadei bad ka Reservation Policy la donkam ban peit bad bishar bniah ba kan long kumno ban ïalam na ka bynta ka jaidbynriew,” u la ong bad bynrap “Kumba ha ka por ilekshon nga la kular ban ïadon ryngkat bad phi ki paidbah, nga kular ruh ba ngan ïadon ryngkat bad phi ki paidbah. Nga kyrpad ruh ïa phi ki paidbah ban long jai jai bad ai ïa ngi kum ki nongmihkhmat ba ngin tih bniah bad kham ngam jylliew shuh shuh halor kane ka kam na ka bynta ka bit ka biang jong ka jaidbynriew.”
