Shillong, Jymmang 30:
Ka Sorkar Meghalaya Democratic Alliance (MDA-2) lyngba u Chief Secretary ka la pyntip ba la thaw thymmai biang ïa ka komiti jong baroh ki seng saiñ pyrthei ka Jylla, ka ban ïakren halor ka jingpyntreikam ïa ka Reservation Roster bad kumjuh ruh ïa ka Reservation Policy ka Jylla.
Katkum ka jingpynbna ba la pynmih da ka tnat Political, la ai por ïa kane ka komiti ba kan phah ïa ki jingai jingmut hapoh shibnai sha ka Sorkar naduh ba pynmih ïa kane ka jingpynbna.
U Chief Secretary ka Jylla, Bah DP Wahlang u la pyntip ba ïa kane ka komiti ba thymmai yn khlieh hi da ka Myntri ka tnat Aiñ ka Kong Ampareen Lyngdoh kum ka Chairperson.
Kane ka jingpynbna jong ka Sorkar ka la mih ruh tang shisngi hadien ba ka Committee on Reservation Roster ba la khlieh da ka Kong Ampareen kaba shong jingïalang ha ka sien ba nyngkong eh ha ka 29 tarik Jymmang, ka la rai ban kyrpad ïa ka Sorkar Jylla ba kan pynïar ïa ka kti treikam jong ka komiti palat ïa ka Roster System da kaba shah ne ailad ba kan ïakren lang noh halor ka bhah thung kam.
Kane ka la mih hadien ba ka Voice of the People Party (VPP), kaba don 4 ngut ki MLA, ka la rai ban nym ïadon bynta lang ha katei ka komiti tad haduh ba ka Sorkar kan mynjur ban ïakren ruh halor ka bhah thung kam.
Ki dkhot jong kane ka komiti ba thymmai ki dei kiba mihkhmat na baroh ki seng saiñ pyrthei ka Jylla. Kine ki long u Zenith M Sangma na ka AITC, Bah HM Shangpliang na ka BJP, u Augustine Marak jong ka GNC, u Bah KP Pangniang na ka HSPDP, Bah Ronnie V Lyngdoh jong ka Congress, Bah Pyndapborthiaw Saibon na ka KHNAM, Dr W Kharluki na ka NPP, Bah Renikton L Tongkhar na ka UDP, Bah Ardent M Basaïawmoit na ka VPP, u Chief Secretary ka Jylla bad u Commissioner & Secretary ka tnat Political kum u Member Secretary.
U Chief Secretary u pyntip ba khnang ban ailad ïa ka jingmihkhmat ba shong hok na baroh ki kynhun, ki seng saiñ pyrthei ki lah ban phah mihkhmat sa mar ar ngut napdeng ki briew ba la paw kyrteng ha ka jingpynbna.
La ong ba ka komiti ka lah ban pynrung ruh ïa kino kino ki dkhot ba kin ïashim bynta ha ki jingïalang jong ka komiti lada ka sngew donkam.
