Shillong, Jymmang 30:
Ka Voice of the People Party (VPP) kaba la mynjur ban leit sha ka jingïalang ba la khot da ka komiti ba la thaw da Sorkar ka la ong ba lada ka jingïakren kam long katkum ka jingkwah jong ka seng, ka jingïakhih shah thngan jong u President ba rangbah (ka seng) kan ïai bteng.
“Ngi sngewkmen ha kane ka janmiet ban pyntip ba ka Sorkar ka la phah ïa kawei ka shithi ha kaba la pynthymmai ïa ka komiti haba ïadei bad ka jinglum lang ïa baroh ki seng saiñ pyrthei ban ïakren halor ka jingpyntreikam ïa ka ‘Reservation Roster System’ bad kaba sngewtynnad ka long ba la kynthup lang ïa ka ‘Reservation Policy’,” la ong u MLA ka Mawlai, Bah Brightstarwell Marbaniang haba ai jingkren ha ka Sngi Ba-ar ha jaka shah thngan u President ka seng hajan Additional Secretariat.
U la ong ba ka seng kumba ka la pynpaw naduh ka sngi kaba nyngkong, haduh mynta ka ïeng skhem ha ka nongrim ba lymda ïakren ïa ka mat halor ka ‘Reservation Policy’, ka VPP kan ym ïadon bynta ha kano-kano ka komiti lane kano-kano ka kynhun kaba ka Sorkar ka khot ban ïakren.
“Nga sngew ba ha kane ka por, ka long ka jingjop na bynta ki paidbah ka Bri U Hynñiewtrep. Kane ka shithi ka la khot ïa ka seng sha ka jingïalang jong ki seng saiñ pyrthei lashai ka sngi ha ka por 2:30 baje mynsngi,” la ong u MLA.
U la ong ruh ba ka seng ha ryngkat u President ba rangbah jong ka, ka la shim ïa ka rai ban leit sha katei ka jingïalang namar ka komiti ba la thaw da ka Sorkar ka la pdiang ban ïakren halor ka mat kaba ka seng ka kwah – ‘Reservation Policy’.
“Hynrei katba ka jingïalang ka dang ïaid, ka jingïakhih kan bteng bad lada ha kata ka jingïakren kam beit ne long kat kumba ngi kwah…kata ban khmih bniah ïa ka ‘Reservation Policy’, kane ka jingïakhih kan dang ïai bteng,” u la ong.
Haba ai khublei ïa ka jingkyrshan u paidbah, u la ong ba ka seng ka sngewkmen namarba ka mih shakhmat na bynta ka lawei jong ki samla ka jaidbynriew.
Shuh shuh utei u nongmihkhmat u la bynrap, “Ngin don ha syndah jong u paidbah naduh ka sngi kaba nyngkong ba ngi rai ban mih shakhmat. Ka thong jong ngi ka long ban don ha syndah jong u paidbah bad kumjuh u paidbah ruh un ym ieh noh ïa ngi bad un don lang ha syndah bad ngi.”
Ka kynhun ka VPP ka ban leit mihkhmat sha ka jingïalang ka ban long ha ka Sngi Ba-ar kan kynthup ïa u Vice-President ka seng, Dr. Kara Chen, General Secretary, Dr. Ricky Syngkon bad nongaiktien ka seng, Dr. Batskhem Myrboh.
