Shillong, Jymmang 30:
Ka Mumbai City FC kan leh burom khatduh ïa u Ahmed Jahouh hadien ba ka kontrak ka jong u ka la poi sha kaba kut ha ka 31 tarik u Jymmang bad une u rangïalehkai shapdeng ka Morocco.
U Jahouh u la pynïasoh sha ka Mumbai City FC ha u Risaw 2020 hadien ba u la long uba biang pura kum u rangïalehkai shapdeng ban ïalehkai ha kane ka lympung ïalehkai kaba heh hapoh ka ri. Une u rangïalehkai na Morocco u la ïadon bynta lang ban pynlong ïa ka Mumbai City ha ka aïom ïalehkai 2020-21 ban long ka kynhun kaba nyngkong ban khur jingjop ha ka ISL League Winners’ Shield bad ruh ban rah ïa ka Trophy ha kajuh ka aïom.
Utei u rangïalehkai ba la 34 snem ka rta u la lah ban ïalehkai bha ha ka aïom ïalehkai 2021-22 ha kaba u la ïarap pynbuh bol haduh hynñiew sien bad bynrap sa san na ka aïom ba la dep bad ïoh thep lai kol.
Une u rangïalehkai u la lah ban noh synñiang ïa katei ka klob ha Riyadh, da kaba u la shut ïa ka corner na ka bynta ban pynbuh bol ïa u Rahul Bheke ban thep kol ha ka jingïakhun pyrshah ïa ka Air Force Club kaba na Iraq ha ka AFC Champions League 2022. Kane ka jingjop ka la long kaba nyngkong na ka bynta u Jahouh bad ka Mumbai City FC ka la wan ha ka kyrdan ba-ar ha ka Group-B.
Kumba ka paw u Jahouh u la long u rangïalehkai ba kynsai sa shisien pat ha kaba ka Mumbai City FC ka la lah ban thaw ïa ka khana ha ka kam ialehkaiï. Ka Mumbai City FC ka la lah ban khur haduh 15 sien ïa ka rekod, kynthup ïa ki jingbym shah rem ha ki 18 tylli ki jingïalehkai, ha kaba u Jahouh u la ïadon bynta ban pynlong ïa ka Mumbai ban rah ïa ka League Winners’ Shield ar sien na ki lai sien ïakhun.
U Jahouh u la lah ban thep kol ha ka minit kaba 70 bad ka jingïalehkai kaba khatduh na ka bynta katei ka klob, kaba u la thep kol lyngba ka penalty spot na ka bynta ban jop da 3-1 kol pyrshah ïa ka Jamshedpur FC bad ban wan ha ka kyrdan ba-ar ha ka Group Stage jong ka AFC Champions League 2023-24.
