Shillong, Jymmang 30:
U MLA ka Nongkrem bad uba dei ruh u President ka Voice of the People Party (VPP), Bah Ardent M Basaïawmoit u la kren shai ba lada ka jingïakren bad ka sorkar halor ka jingpynbeit thymmai ïa ka bhah thung kam thung jam kam seisoh un bteng biang ïa ka jingshah thngan.
Kane ka jingkren u Bah Ardent ka dei hadien ba ki samla pule hapoh ka jingïalam ka Hynñiewtrep Youths’ Council (HYC) ki la wan ïaid kjat naduh ophis MBoSE ter ter sha Lachumiere, IGP haduh Additional Secretariat kaba u Bah Ardent u shong shah thngan kaba la long mynta ka sngi ka 30 tarik Jymmang, 2023.
Haba ki samla pule ki la wan poi ha katei ka jaka ki la pyrta im slem Bah Ardent bad u Bah Ardent ruh u la ïeng na jaka ba u thiah ban ai jingkren sha ki paidbah.
U Bah Ardent haba ai jingkren u la ong ba ha kane ka jingïakhun u don jingkyrmen ban jop beit namar ka jingeh ki khun samla ha ka wad kam.
Kumta u la kyntu ïa ki paidbah ba kin nym pynmih kano kano ka jingkulmar khnang um kwah ba ka sorkar kan ïoh ban shim kabu, hynrei u kwah ban ïaid da ka lynti kaba jaijai.
“Ka mut tang namar ba ka sorkar ka khot ïakren ngin song noh ki tiar ki tar ban leit sha ïing, hynrei ngin ap ïa ka jingïakren namar lada kam seisoh ngan shong shah thngan biang” u la ong.
Kane ka jingshah thngan u Bah Ardent ka la dap thik shi taïew mynta ka Sngi Ba-ar ha ka por 10 baje mynstep kaba u la sdang naduh ka 23 tarik Jymmang, 2023 bad kaba dang bteng haduh mynta.
Haba ïakren bad u Bah Ardent ha ka por mynstep u la pynpaw ba ki briew kin lyngngoh balei um pat lei-lei haduh u la shah thngan mynta la shi taïew, hynrei kane ka dei ka jingai bor U Blei bad ka jingkyrshan ki paidbah.
“Haduh mynta kam pat don ka jingsngewpher, nga ngeit ba ngan dang bteng ïa ka jingshah thngan namar ki doktor ki la wan thew man ka sngi” u la ong.
Nalor kata, u la pynpaw ka jingsngewtynnad haba ka jaidbynriew ka kyrshan ha kane ka jingïakih bad kane ka pyni ïa ka jingïatylli.
“Ngan sangeh ïa ka jingshah thngan tad haduh ba ka sorkar ka la rai ba la pynthymmai ïa ka bhah thung kam thung jam da kaba ai kham bun sha ki Khasi Jaiñtia kiba la nang roi” u la ong.
Namar kata, u la ong lada ka sorkar kam lah ban pynbeit mynta ïa kane ka bhah thung kam thung jam kan buh jingeh ïa ki khun samla ha kine ki 20 snem kin nym ïoh kam sorkar.
