Shillong, Jymmang 30:
Ki khlur nongïalympat ka ri, kita ka Sakshi Malik, Vinesh Phogat bad u Bajrang Punia lem bad ki spah ngut ki nongkyrshan ki la poi ha Har ki Pauri na ka bynta ban pynngam noh ïa ki takma ha ka wah Ganga wat hapdeng ka jingpahara ki bor pulit ïa katei ka jaka ha ka Sngi Ba-ar.
Kiba bun ki paidbah ki la ïalum lang ha Har ki Pauri ha kaba ki nongïalympat kiba ïakhih pyrshah ki long ba la khreh ban pynngam noh ïa ki takma ba ïoh khur ha ka pyrthei bad kumjuh ha ka Olympic ha katei ka wah kaba khuid kaba long kum ka dak ban pynpaw ïa ka jingpyrshah ïa u nongïalam ka Wrestling Federation of India u Brij Bhushan Sharan Singh halor ka jingshah kynnoh don kti ha ki kam ban thombor ïa ki khynnah kynthei.
Hadien ba poi ha katei ka jaka, kitei ki nongïalehkai ki la ïeng ban pynlong ka jingsngap jar kaba 20 minit. Katba hadien kata ki la shong ha ka rud jong katei ka wah ban pynpaw ïa ka jingpyrshah ïa utei u nongïalam ka WFI.
Nalor kata, kitei ki nongïalympat kiba la shah kem ha ki pulit jong ka nongbah Delhi bad pynkynriah noh na Jantar Mantar ha ka 28 tarik mynta u bnai, ki la ong ba kin pynngam noh ïa ki takma bad ban pynlong ka jingshah thngan haduh ka jingïap ha India Gate.
Hynrei ki pulit ha ka Sngi Ba-ar kim shym la shah ïa kitei ki nongïakhih ha India Gate.
Kham ha shwa ka Sakshi, kaba la khur ïa ka takma rnong ha ka Rio Olympics 2016, ka la pynpaw ha ka kyrwoh lyngba ka ‘Twitter’ ba ki nongïalympat kin leit shaduh Haridwar na ka bynta ban pynngam ïa ki takma.
“Kine ki takma ki dei ka jingim bad ka jingim jong ngi. Ngin leit ban pynngam noh ïa ki ha wah Ganges namar ka dei ka Maa Ganga. Hadien kata, ym don jingmut shuh ban im. Kumta ngin pynlong ka jingshah thngan haduh ban da ïap ha ka India Gate,” ka la bynrap lyngba katei ka kyrwoh.
Kane kajuh ka kyrwoh la wanrah da ka Vinesh. Ka sngi Ba-ar ka dei ka sngi jong ka Ganga Dussehra ha kane ka jaka bad la khmih lynti ba shibun ki paidbah kin wan sha kane ka wan ban buh ki jingdwai.
“Ngi la khur ïa kine ki takma da ka jingtrei shitom bad ka long kaba khuid kum ka wah Ganga. Kine ki takma ki long kiba khuid bad ym don jaka ban buh ïa ki lait sa tang ha ka wah Ganga,” la bynrap ka Sakshi.
“Ka India Gate ka dei ka jaka jong kito ki ’riew shlur kiba la pha ïa la ka jong ka jingim na ka bynta ka ri. Ngim long kiba khuid kum ma ki, hynrei ngi ïalehkai ha ki lympung ïalehkai shabar ri kaba syriem kum ki shipai kiba shlur.”
Na ka liang ka Sakshi ka la khmih lynti ba ka President jong ka ri ka Draupadi Murmu lem bad u Myntri Rangbahduh u Narendra Modi kin kren eiei halor kane ka mat.
“Mynta ngim kwah shuh ïa kine ki takma namar da kaba deng ïa ki ka shu pyntyngshaiñ hakhmat ki paidbah, hynrei ngi la shah thombor kylla. Lada ngi kren ïa ki jingshah thombor, ngi la shah set patok.”
Kum ban pynkynmaw, ha ka 28 tarik ki pulit ka Delhi ki la kem ïa ka Malik ryngkat ka khlur ïalehkai kaba la khur ïa ka takma rnong ha ka world championships ka Vinesh bad u rangïalehkai uba la khur takma ha ka Olympic u Bajrang. Hadien kata kitei ki nongïalympat ki la shah ujor da ka FIR ba ki pynkheiñ ïa ki kyndon aiñ.
