Shillong, Jymmang 30:
U Andre Marriner u la pynbna ban shongthait noh na ka kam kum rephri hadien arphew snem ba u la shimti ban pynïaid ïa ki jingïalehkai ha ka Premier League.
U Marriner, 52 snem, u la shimti ban pynïaid ïa ka jingïakhun kaba khatduh ha kaba ka Arsenal ka la jop da 5-0 kol ïa ka Wolves ha ka Sngi U Blei. Kane ka dei ka jingïalehkai kaba 391 sien ban pynïaid ha kane ka lympung ha shwa ban un pynkut noh ïa ka jingshakri.
“Nga la duh noh ban hiar sha madan, hynrei ka la long ka jingsah kynmaw haba nga phai dien ïa ki jingïoh shimti ban pynïaid ïa ki jingïalehkai,” u la bynrap hadien ba u la pynbna shongthait noh ha ka Sngi Ba-ar.
“Ka long ka lynti kaba jngai bad kaba pynsah kynmaw naduh ba la ïoh rung sha ka Birmingham County FA ha ka por ba nga dang ha ka rta kaba 20 snem bad nga sngew sarong ba ngan lah ban pynïaid ïa kiba bun ki jingïalehkai. Nga sngew ba ka long ka burom kaba khraw ba ngan ïadon bynta ha ki lympung ïalehkai shabar ri, kumjuh ha ki jingïakhun final bad ban long u nongpynïaid ha ka lympung kylleng kaba paw ha ka pyrthei.”
“Nga la ïoh jingkyrshan ha kane ka jingïaid lynti kaba la kham slem bad ngam lah khlem da ai khublei ïa ki bahaïing, ki paralok, ka PGMOL bad ka FA namar ka kam pynïaid rephri ka long ka jingim ka jong nga na ki katto katne snem.
U Marriner u la pynlut haduh 23 snem ban pynïaid ha ki lympung ïalehkai kiba heh jong ka England, ka jingïalehkai kaba nyngkong eh kaba u la ïoh ban shimti ban pynïaid ha ka Premier League ka dei ha ka jingïakhun hapdeng ka Charlton bad ka Norwich ha u Naiwieng jong u snem 2004.
Hadien ba u la ïadon bynta ban ïaid ïa ka Football League naduh u snem 2000, u la shah jied ban ïasoh hapoh ka Select Group kaba long ka kynhun ka ban jied ïa ki rephri na ka bynta ka Premier League, FA Cup League Cup bad ka Football League.
