Shillong, Jymmang 30:
U Coach ka kynhun ki rangïalehkai U-17 ka ri u Bibiano Fernandes ha ka sngi Ba-ar u la pynbna ïa ka kyrteng jong 23 ngut ki rangïalehkai ki ban mihkhmat ha ka AFC U-17 Asian Cup Thailand 2023.
Kum ban shu pynkynmaw kane ka kynhun ka la leit kilanmet sha Spain bad Germany ha ki shi bnai shiteng. Ha kane ka jingkilan met ka la ïoh ban pyrshah ïa ki kynhun ïalehkai jong ka Atletico de Madrid, CD Leganes, Real Madrid CF, Getafe CF, VfB Stuttgart, SSV Reutlingen, FC Augsburg bad ka TSV Schwaben Augsburg, ha kaba ka la jop san sien, shah rem saw sien bad ïakhaid shisien.
Kane ka kynhun ka ban leit sha Thailand ha ka 1 tarik u Jylliew, kan pynkhreh ban ïakhun pyrshah ïa ka Vietnam ha ka 17 tarik, ïa ka Uzbekistan ha ka 20 tarik, Japan ha ka 23 tarik u Jylliew. Ïa kane ka jingïalehkai jong ka Group-D yn pynlong ha Pathum Thani bad Bangkok.
Haba pynpaw hashwa ba kane ka kynhun kan leit ïashim bynta, u Bibiano Fernandes u la ong, “Ngi la ïoh ïa ka por kaba biang eh ha Spain bad Germany, bad baroh ki rangïalehkai ki la ïoh ban ïashim bynta pyrshah ïa ki kynhun kiba kynsai na kitei ar tylli ki ri. Ngi la ïoh ruh ki jingkilanmet hapoh ka jingai jinghikai ki coach ha Atletico Madrid, Stuttgart, bad Augsburg ha kaba ka la long kaba biang eh na ka bynta ki khynnah. Mynta ka la dei ban por ban pynleit jingmut ha kane ka jingïaid lynti ha Thailand na ka bynta ka AFC U-17 Asian Cup.”
Ki kyrteng jong 23 ngut ki rangïalehkai ka ri ki long:
GOALKEEPER: Sahil, Julfikar Gazi & Pranav Sundarraman.
DEFENDER: Ricky Meetei Haobam, Surajkumar Singh Ngangbam, Mukul Panwar, Malemngamba Singh Thokchom, Pramveer & Dhanajit Ashangbam.
MIDFIELDER: Vanlalpeka Guite, Danny Meitei Laishram, Gurnaj Singh Grewal, Korou Singh Thingujam, Lalpekhlua, Rohen Singh Chaphamayum, Omang Dodum, Faizan Waheed, Akash Tirkey & Prachit Vishwas Naik Gaonkar.
FORWARD: Thanglalsoun Gangte, Shashwat Panwar, Gogocha Chungkham & Lemmet Tangvah.
