
Shillong, Jymmang:
Ka Hill State People’s Democratic Party (HSPDP) ka seng kaba ïeng ha ka nongrim naduh mynshwa ban ïakhun lang bad ki paid Garo da ka jingsngewthuh jingmut halor ka jingdawa ban ïoh mar la kajong ka Jylla, ka la ong ba ka jingïoh Jylla la kajong kan dei tang ma ka kaba lah ban weng ïa ki jingeh bad ka lawei ïa ki paid Khasi Jaiñtia kum ka jaitbynriew.
Haba kylli halor ka jingïakhun ban ïoh la kajong ka Jylla bad ka Reservation Policy, u President ka HSPDP, u Bah KP Pangniang u la ong ba ka HSPDP hapoh ka jingïalam u Bah Hoping Stone Lyngdoh naduh mynshwa, u la ong ba haba la ïaid bun phew snem kum ka Jylla, wat lada ka dei ka Jylla kaba rit, ka la dei ka por ban dawa mar la kajong ka Jylla namar ka suk tam eh ban thaw aiñ ha Ïingdorbar Thawaiñ.
“I Bah Hoping (Maieid Hoping) i la ju ong ïa ngi ba ka Jylla kaba donlang ki jaitbynriew kiba ïapher ha ka jinglong, ka ktien bad ka dustur, ngi dei ban ïeng skhem ban dawa ïa ka Jylla Khasi Jaiñtia da kaba ïasuk bad ïahun bad ki paid Garo. Ka Jylla la kajong ka dei kaba lah ban weng ïa ki jingeh, bad ka dei tang ma ka, ka lawei ïa ki paid Khasi Jaiñtia kum ka jaitbynriew nalor kiwei ki jingeh haba ïadei bad ka khyndew ka shyiap,” la pynkynmaw u Bah Pangniang.
Une u President ka HSPDP ruh u la ong ba ka HSPDP bad ka Garo Statehood Movement Committee (GSMC) ki la dep ruh ban thaw ïa ka Coordination Committee ha kaba la buh ïa u kum u Chairman bad u Nikman Marak kum u Co-chairman ban ïaid lang da ka jingsngewthuh.