Washington, Jymmang:
Ka United States ha ka Sngi Balang, ka la iathuh ba ka China ka kyntait ia ka jingtyrwa ban pynlong jingialang ha Singapore hapdeng u Defence Secretary ka US u Llyod Austin bad u Myntri ka tnat iada ka China u Li Shangfu.
Ka US ha katei hi ka miet Sngi Ba-ar ka la pyntip ba ka China ka la kyntait ia katei ka jingtyrwa jongka ban shong jingialang ha ki sngi ba kut jong une u Jymmang, ha kaba ka US ka la dep pynbeit bad pynkhreh ia ka jingiakynduh hapdeng u Myntri ka tnat iada jongka bad ka China hapoh Singapore.
Hynrei la ong ba ka US kan dang wad lad ban ioh pyn iakren hapdeng ka tnat iada jong ka US bad ka China naka bynta ki jingbha ha ki por ban wan.
Kumta ki heh ka tnat iada jong ka United States ki la ong ba katei ka jingkyntait jong ka China ka long tang ka jingai daw ban lait na ka jingiakren. Namar la ong ruh ba ka China naduh u snem 2021, ka la kyntait kumba 12 tylli ki jingtyrwa khot iakren jong ka tnat iada ka US naka bynta ban iakren ia pynbeit halor ka jingshngaiñ bad ka jinglong- jingman haba iadei bad ka tnat iada jong kine ki arliang ri.
U Li u la shah pynngat kyndon ha ka sorkar US ha u snem 2018 namar ka jingthied ia ki tiar ka Russia, hynrei la ong ba katei ka jingpynngat kyndon jong ka US kam shym mut pat ban khang noh ia ki jingiadei kam hapdeng u Li bad u Austin.
U Austin u la dei ban leit sha Singapore ha kane hi ka taiew ban leit iadon bynta ha ka Shangri-La Dialogue, kaba long ka jingialang baheh jong ka tnat iada ha kaba u la iakynduh ruh bad u Wei Frnghe ha u Jylliew jong u snem ba la leit.
Hynrei u Austin bad u Wei ki la ioh ban iakynduh biang ha ki bnai kut snem jong u 2022, katba ka jingiadei hapdeng ka United States bad ka China ka nang sniew shuh shuh ha une u snem namar jong ka Taiwan bad kumjuh ruh halor ka jingsuba sniew halor ka kynja tiar ‘balloon’ kaba la leit her na China sha United States hashwa ka jingleit jong u Antony Blinken sha China bad ha kaba ka US ka la ioh ban siat pynhap noh ia katei ka tiar ha ki khyndiat bnai ba la leit. Lah ruh ban ong ba ka China ka kyntait ia kitei ki jingkhot ban iakren bad ban shong jingialang namar ba ka kwah ban kiar na ka mat shaphang ka Taiwan.
