Shillong, Jymmang:
U MLA ka Nongstoiñ konstitwensi, Bah Gabriel Wahlang u la pynpaw ïa ka jingpyrshah kaba jur halor ka jingpynkynriah bad kit noh ïa ki tiar ki tar sumar napoh ka Maternal and Child Health Hospital kaba don ha Nongstoiñ, West Khasi Hills District sha ka Civil Hospital, Mawkyrwat ha South West Khasi Hills District.
Ha kaba ïadei bad kane ka jingleh jong ka tnat ka koit ka khiah, na ka liang jong u MLA u la dep ban phah ruh da ka jingthoh naduh ka 18 tarik mynta u bnai sha ka Kong Ampareen Lyngdoh kaba dei ka Myntri ka tnat ka Koit ka Khiah ka Sorkar Jylla ban pynpaw ïa ka jingsngew pyrshah jur ka jong u halor kane ka jinglong jingman.
Haba kren sha ki lad pathai khubor ha ka Sngi Nyngkong, u Bah Gabriel Wahlang u la ong, ba kane ka jingpyrshah ka jong u, ka long halor ki nongrim, ba ïa ka jingtei ïa kane ka MCH hospital ha Nongstoiñ kaba 50 jingthiah la dep ban pyndep naduh u snem 2018, hynrei ka bym shym la lah ban pyntrei wat haduh mynta. Halor kane, u la ong ba u kwah ruh ban tip ïa ka daw jong ka jingbym lah ban pyntreikam.
U la ong ba lah ruh ban kdew ba ka MCH hospital kaba jan tam na ka bynta ki paidbah ka Nongstoiñ ka long ha Lawmali, Shillong kaba jngai kumba 100 km. Kumta ka jingdon ïa ka MCH hospital ha Nongstoiñ, kan long ka jingkyrkhu kaba khraw ïa kito ki khyllung kiba dang shu kha, ïa ki longkmie ba armet jong ka West Khasi Hills.
Nalor kane, u la ong ba ïa ki tiar ki tar la thied katkum ka jingdonkam jong ka MCH hospital bad ym na ka bynta ka Civil Hospital. Kumta kum u nongmihkhmat ba la jied da ki paidbah, ka dei ka kamram ban peit ïa kine ki jingduna bad ki jingeh ba kum ki paidbah khamtam ki longkmie ba armet ki mad.
U Bah Gabriel u la ong ba halor kane ka MCH hospital, u la dep ruh ban rah bad ïakren hapoh ka ïingdorbar, ba la donkam ban plie noh ïa ka na ka bynta ka bit ka biang jong ki nongshong shnong ka Nongstoiñ bad ki shnong ba marjan.
“Nga kyntu ïa ka tnat ka koit ka khiah ba ka dei ban plie noh mardor ïa kane ka MCH hospital khnang ba kan long ka jingmyntoi kaba khraw ïa ki paid nongshong shnong jong ka West Khasi Hills,” la ong u Bah Gabriel bad pyntip ba na ka liang ka Myntri ka la kular ba ha u bnai Jylliew kan sa hiar sha kane ka hospital ban peit bad jurip da lade ïa ka jinglong jingman jong katei ka jaka sumar.
